Magazinë
Transmetuar më 18-01-2025, 09:39

Kvicha Kvaratskhelia është lojtari më i ri i PSG-së. Klubi parizien e ka konfirmuar transferimin e tij përmes një komunikate zyrtare. "Paris Saint-Germain ka kënaqësinë të njoftojë nënshkrimin me Khvicha Kvaratskhelia, – thuhet në deklaratë. – Anësori 23-vjeçar, i cili do të mbajë fanellën me numrin 7, bëhet lojtari i parë gjeorgjian në historinë e klubit tonë".

Pasi mbërriti në mënyrë të fshehtë në Paris, dje në mëngjes, për të kryer vizitat mjekësore, gjeorgjiani firmosi kontratën deri në qershor të vitit 2029. Kjo marrëveshje i sjell Napolit 70 milionë euro fikse, plus 5 milionë në formë bonusesh.

Dashuria mes Kvaratskhelias dhe PSG-së ka qenë një histori afatgjatë. Verën e kaluar, Luis Enrique kishte kërkuar ta merrte në skuadër, por De Laurentiis dhe Conte e kishin bindur lojtarin gjeorgjian të qëndronte te Napoli, pavarësisht mungesës së rinovimit të kontratës. Megjithatë, në janar, dëshira e lojtarit për të kaluar në Francë u bë tepër e madhe për t’u frenuar, kësisoji marrëveshja u kthye në qendër të vëmendjes deri në realizimin e saj.

Të mërkurën, Kvara kishte zbrazur dollapin e tij në “Castel Volturno”, duke përshëndetur dhe falënderuar ekipin. Një ditë më pas publikoi një mesazh lamtumire për qytetin dhe tifozët. Me klubin e Napolit, Kvara luajti 107 ndeshje, shënoi 30 gola dhe dha 29 asistime, duke fituar titullin e Serie A në sezonin 2022/23.

Mund të jetë një imazh i 1 person, duke luajtur futboll, duke luajtur futboll dhe teksti

Kvara: Është një ëndërr të jem te PSG

"Është një ëndërr të jem këtu. Kam dëgjuar shumë gjëra pozitive për Paris Saint-Germain. Jam jashtëzakonisht krenar që i bashkohem këtij klubi të madh dhe mezi pres të vesh ngjyrat e mia të reja", – ishin fjalët e para të Kvara, pas njoftimit për transferimin e tij te klubi parizien.

Napoli: Faleminderit, Kvara!

Pas zyrtarizimit nga parizienët Napoli e konfirmoi gjithashtu operacionin dhe falënderoi lojtarin përmes kanaleve të tij zyrtare në rrjetet sociale.

Al-Khelaifi: Kvara i vendosur për t’u bërë pjesë e klubit tonë

Presidenti i PSG-së, Nasser Al-Khelaifi, e mirëpriti Kvaratskhelian pas njoftimit zyrtar: "Jemi të lumtur që mirëpresim Khvicha Kvaratskhelian në familjen e Paris Saint-Germain. Ai është një nga lojtarët më emocionues të futbollit botëror, një talent fantastik dhe lojtar i guximshëm që lufton për skuadrën më shumë se çdo gjë tjetër. Khvicha ishte kaq i vendosur për t’u bërë pjesë e klubit tonë të madh, ndaj e di që do t’i arrijë të gjitha objektivat e tij me ne. Jemi të lumtur që po e forcojmë ekipin tonë me një lojtar të tillë".

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Bashkohu me kanalin e NOA WhatsApp për lajmet më të fundit direkt në celularin tënd

Lajmet e fundit