Në spotin e diskutueshëm, një njeri zhytet në një “liqen salce” dhe rilind si… një copë gjigante pule të fërguar. A është kjo vetëm humor, apo fyerje ndaj besimit fetar?

Një reklamë e re e KFC ka shkaktuar valë kritikash në Britani, duke u cilësuar si blasfemuese, qesharake ndaj Zotit dhe kanibale, sipas qindra qytetarëve të zemëruar që kanë paraqitur ankesa.

Spoti i titulluar “All Hail Gravy” tregon një burrë që humbet në një pyll dhe përballet me një grup të panjohur njerëzish që kryejnë një “ritual”. Ata mbajnë një vezë të madhe të artë dhe e zhysin burrin në një liqen me salcë, ku ai del i “rilindur” si një copë gjigante pule të fërguar.

Reklama përfundon me frazën: “Besoni te pula”.

Sipas medieve britanike që citon noa.al, Autoriteti i Standardeve të Reklamimit (ASA) ka marrë afro 1000 ankesa nga të krishterë të të gjitha besimeve që e konsiderojnë fushatën si fyese dhe tallëse ndaj riteve të pagëzimit dhe besimit të tyre.

Ndërkohë, KFC dhe agjencia që e krijoi reklamën janë shprehur se spoti nuk thyen rregullat dhe ka natyrë humoristike. Autoritetet ende nuk kanë vendosur nëse do të ndalohet apo jo transmetimi i reklamës që shikoni më poshtë:

Ngjarja ka hapur një debat të fortë për kufijtë mes marketingut kreativ dhe respektit ndaj besimeve fetare.