Një grua 64-vjeçare nga Los Anxhelosi, me emrin Guadalupe Cepeda, ra viktimë e një mashtrimi online, pasi një person u paraqit si këngëtari i famshëm Enrique Iglesias.

Për më shumë se dy vite, ajo besonte se ishte në një marrëdhënie virtuale me artistin dhe i dërgoi mijëra dollarë, duke ndjekur kërkesat e tij të vazhdueshme për ndihmë financiare.

Mashtruesi e kishte bindur se kishte nevojë për para, dhe madje kur ajo kishte vështirësi ekonomike, i kërkonte të merrte para nga burime të tjera, përfshirë bashkëshortin e saj. Gruaja arriti deri aty sa të mendonte divorcin, për të qenë “bashkë me Enrique”.

Burri i saj, duke dyshuar për sjelljen e pazakontë, kontrolloi telefonin dhe zbuloi mesazhet me “Enrique Iglesias”. Edhe pse në fillim ajo nuk pranonte realitetin, më në fund e kuptoi të vërtetën kur gjurmët e komunikimit çuan në Nigeri – vend nga ku shpesh organizohen mashtrime të tilla.

Rasti u bë publik si një shembull i rrezikut të mashtrimeve online, veçanërisht kur bëhet fjalë për figura të famshme. Autoritetet theksojnë rëndësinë e verifikimit të identitetit në çdo komunikim virtual dhe paralajmërojnë qytetarët të mos bien pre e premtimeve romantike në internet nga “yje” që kërkojnë para.

Vetëm pak muaj më parë, doli në media fakti se një grua 63-vjeçare franceze besoi se kishte një lidhje online me aktorin e Hollivudit, Brad Pitt dhe i dërgoi atij rreth 800,000 për disa vite. /noa.al