Fushë Krujë / Finalizohet operacioni “Formacioni” – Goditet një grup kriminal i dyshuar për disa vjedhje

Policia ka arrestuar 4 persona dhe ka shpallur në kërkim 3 të tjerë, pjesëtarë të një grupi të dyshuar kriminal që vepronte në zonën e Fushë Krujës. Mes të ndaluarve është edhe një shtetas i shpallur më herët në kërkim për dy vepra të tjera penale.

Operacioni policor i koduar “Formacioni” u finalizua nga shërbimet e Komisariatit të Policisë Krujë, falë bashkëpunimit me qytetarët dhe hetimeve të kryera pas denoncimeve për vjedhje në këtë zonë.

Gjatë këtij operacioni u identifikuan 7 persona si pjesë e një grupi të strukturuar kriminal në fushën e vjedhjeve, njëri prej të cilëve ishte arrestuar më herët.

Në kuadër të operacionit u arrestuan shtetasit:

Aleksandër Bushgjokaj, 24 vjeç, banues në Kamzë, i cili ishte në kërkim edhe për veprat penale “Shkatërrimi i pronës” dhe “Largimi nga vendi i aksidentit”;

Gani Lamaj, 33 vjeç, banues në Kamzë;

Kriste Bushgjokaj, 29 vjeç, banues në Kamzë.

Shtetasi Kriste Bushgjokaj u kap në flagrancë duke drejtuar një automjet të marrë me qira, pa leje drejtimi. Automjeti dyshohet se është përdorur nga grupi për të kryer dhe për t’u larguar nga vendngjarjet. Mjeti u sekuestrua në cilësinë e provës materiale.

U shpallën në kërkim shtetasit:

Gledian Vuka, 22 vjeç;

Leonard Kuçi, 33 vjeç;

Françesko Bushgjokaj (Dervishi), 33 vjeç, të tre banues në Kamzë.

Gjithashtu, si pjesë e këtij grupi u identifikua edhe shtetasi Andi Rasha, i arrestuar më herët për vjedhje.

View this post on Instagram

A post shared by Agjencia Kombëtare e Lajmeve NOA (@noanews)

Nga hetimet e kryera, dyshohet se:

Më datë 27.03.2025, të 7 shtetasit, në bashkëpunim me njëri-tjetrin, kanë vjedhur 16.000 lekë në një subjekt për transferta parash;

Më datë 28.03.2025, 6 prej këtyre shtetasve kanë vjedhur 21 celularë në një dyqan.

Vijon puna për kapjen e të shpallurve në kërkim. Nën drejtimin e Prokurorisë së Tiranës, hetimet vijojnë për dokumentimin me prova të tjera ligjore të veprave të mundshme penale të këtij grupi.

Materialet procedurale i kaluan Prokurorisë për veprime të mëtejshme. /noa.al