Ferizaj, 4 Prill 2025 – Një skandal i pazakontë ka përfshirë komunitetin shqiptar të Diasporës pas një akti bamirësie që përfundoi në zhgënjim të thellë. Katër të rinj shqiptarë nga Shqipëria, Kosova dhe Maqedonia e Veriut, që jetojnë në Europë, kishin vendosur të surprizonin banorin e tyre të preferuar të Big Brother VIP Albania, Gjestin, duke mbledhur një shumë prej mbi 5,000 euro.

Këto para ishin destinuar për fluturimin e parashutave dhe dronëve mbi shtëpinë e BBVA, në mbështetje të Gjestit. Por, surpriza nuk ndodhi kurrë.

Personi që mori përsipër organizimin dhe administrimin e fondeve ishte Diamant Aliu, 32 vjeç nga Ferizaj. Pasi mori shumën, ai u zhduk pa lënë gjurmë, duke mos dhënë asnjë shpjegim për fatin e parave.

Emisioni investigativ “Piranjat” udhëtoi drejt Ferizajt për të kontaktuar me të. Pas përpjekjeve të shumta, ata e gjetën Diamantin në derën e shtëpisë së tij, por ky i fundit refuzoi të flasë dhe mbylli derën pa dhënë asnjë sqarim.

Gjatë hetimit, bashkëshortja e tij deklaroi se ishte ndarë nga ai dhe nuk kishte asnjë lidhje me mashtrimet në fjalë. Familjarët e tij, të cilët ndodheshin në një fshat pranë Ferizajt, gjithashtu nuk u gjendën në shtëpi për të dhënë një koment.

Rasti ka ngjallur zemërim në rrjete sociale dhe kërkesa për drejtësi nga ndjekësit e BBVA dhe mbështetësit e Gjestit.