Durrës: Apartament i përshtatur për prostitucion, dy shtetase kineze në hetim – 6 shtetas shqiptarë procedohen

Një apartament në lagjen nr. 13, Plazh, Durrës, është zbuluar si vend i përdorur për ushtrimin e prostitucionit nga dy shtetase kineze, të cilat e kishin marrë me qira dhe e kishin përshtatur për këtë veprimtari.

Pas një hetimi dyjavor, janë proceduar penalisht 8 persona në total: dy gratë kineze dhe gjashtë shtetas shqiptarë që ndodheshin në banesë në momentin e ndërhyrjes, raporton noa.al.

Hetimet kanë zbuluar se dy gratë, të moshës 41 dhe 54 vjeçe, ushtronin prostitucion në ambientin e marrë me qira, ndërsa dyshohet se janë pjesë e një rrjeti më të gjerë kriminal me origjinë kineze, që rekruton gra në Kinë dhe i sjell në Shqipëri për këtë qëllim.

Grupi u siguron akomodim dhe klientë përmes platformave online, duke organizuar aktivitetin përmes rrugëve të koduara digjitale.

Gjatë kontrolleve janë sekuestruar si prova materiale: 86.400 lekë dhe 440 euro, tre celularë, dy pasaporta, karta banke dhe karta telefoni.

Vijojnë hetimet për identifikimin dhe ndalimin e organizatorëve të këtij aktiviteti të strukturuar.

Prokuroria e Durrësit ka marrë në dorë materialet për vijimin e procedurave ligjore. /noa.al