Washington- “Presidenti i Shteteve të Bashkuara, Donald Trump, u ka thënë bashkëpunëtorëve dhe anëtarëve të kabinetit të tij se Elon Musk do të largohet nga posti i tij brenda “javëve të ardhshme””. Kështu shkruan gazeta amerikane “Politico”, duke theksuar se Trump “mbetet i kënaqur” me punën e bërë nga Musk në krye të Departamentit për Efiçencën e Qeverisë (Doge).

Të dy, sipas disa burimeve anonime, kanë “vendosur ditët e fundit se së shpejti do të vijë momenti që Musk të kthehet te kompanitë e tij, duke marrë një rol mbështetës”.

Një zyrtar anonim ka deklaruar se Musk “ndoshta do të ruajë një rol këshilltar informal”.

Shtëpia e Bardhë e ka quajtur “marrëzi” artikullin e publikuar nga e përditshmja “Politico”.

Zëdhënësja e Shtëpisë së Bardhë, Karoline Leavitt, ka shkruar në X se “ky lajm është i pavërtetë: presidenti dhe Elon Musk kanë thënë të dy publikisht se Elon do të largohet nga shërbimi publik si punonjës special i qeverisë sapo të përfundojë puna e tij” në departamentin për Efiçencën e qeverisë.