Vendimi për çështjen e inceneratorit më 16 prill – të pandehurit kërkojnë pafajësi, SPAK ka kërkuar 26 vite burg në total

Tiranë – Gjykata e Posaçme kundër Korrupsionit dhe Krimit të Organizuar do të shpallë më 16 prill vendimin për çështjen e njohur të inceneratorit, ku mes të pandehurve ndodhet edhe ish-ministri i Mjedisit, Lefter Koka. Ai akuzohet për shpërdorim detyre në një skemë që, sipas SPAK, i ka shkaktuar buxhetit të shtetit miliona euro dëm.

Në seancën e fundit gjyqësore, të gjithë të pandehurit kanë kërkuar pafajësinë, përfshirë edhe ish-drejtorin Taulant Tusha dhe vetë ish-ministrin Koka. Ndërkohë, avokati i Namik Simixhiut, Ermir Beta, dorëzoi një dokument mjekësor në gjykatë, duke pretenduar se klienti i tij vuan nga sëmundje kronike dhe se kërkesa për dënim është e pabazuar.

Në shkurt, Prokuroria e Posaçme (SPAK) shpalli pretencën për 8 të pandehurit, duke kërkuar në total 26 vite burg. Akuza i përshkruan si bashkëpunëtor në favorizimin e kompanisë që fitoi koncesionin për inceneratorin, me dijeninë dhe aprovimin e Lefter Kokës.

Për vetë Kokën, SPAK kërkoi 4 vite burg, që me gjykim të shkurtuar ulet në 2.8 vite. I njëjti dënim është kërkuar edhe për Bledar Karolin, anëtar i komisionit, si dhe për Fatjon Muratin dhe ish-zyrtarët e Bashkisë së Tiranës, Taulant Tusha dhe Namik Simixhiu.

Nëse gjykata i shpall fajtorë, të gjithë të pandehurit do të përfitojnë ulje të dënimit me 1/3, për shkak të procedurës së gjykimit të shkurtuar.

Kujtojmë se më herët, për çështjen e inceneratorit të Tiranës, është dënuar edhe Alqi Bllako me 4 vite burg.

Vendimi i 16 prillit pritet me interes të lartë publik, pasi çështja ka qenë një nga më të përfolurat për lidhjet mes politikës, koncesioneve dhe korrupsionit në nivele të larta.