Më 28 mars u bë e ditur se Gjykata e Lartë e Drejtësisë e Katalonjës (TSJC) shpalli pafajësinë e Dani Alves për akuzën e agresionit seksual, për të cilën ishte dënuar me 4.5 vite burg nga shkalla e parë.

Ish-futbollisti brazilian kishte qëndruar në paraburgim për 14 muaj, por aktualisht ndodhej në liri provizore, pas depozitimit të një garancie prej një milion euro nga avokati i tij, siç ishte vendosur nga Gjykata e Barcelonës.

Pas shpalljes së vendimit të pafajësisë, “Vamos a ver”, programi i “Telecinco”, konfirmoi se rrethi i ish-mbrojtësit të Barcelonës ishte shumë i kënaqur. Të dielën ishte Joana Sanz, gruaja e Dani Alves, ajo që theu heshtjen dhe lëshoi një deklaratë të fuqishme përmes llogarisë së saj personale në Instagram. Ajo shpjegoi se si ndihet dhe çfarë ka përjetuar që nga dita kur u publikua lajmi i parë për mundësinë e krimit të partnerit të saj.

Mesazhi i parë pas pafajësisë së brazilianit ishte: "Gazetarë, mjaft më me sajesa. Lëreni shpifjen". Ky mesazh shoqërohej me një foto, ku ajo shfaqej duke festuar publikisht vendimin e Gjykatës së Lartë të Drejtësisë të Katalonjës (TSJC).

Megjithatë, më vonë ajo vendosi të shkruante një deklaratë dhe përdori një imazh ku shfaqej shumë e buzëqeshur. Sanz filloi duke shpjeguar: "Më treguan me gisht, më ofenduan, më kërcënuan dhe më përndoqën për dy vite si të isha unë ajo që ishte në bankën e të akuzuarve".

Nga ana tjetër, modelja theksoi gjithë dëmin që ka pësuar gjatë kësaj kohe: "Pavarësisht gjithë këtij dëmi mediatik/publik, unë ende qëndroj e fortë, pa humbur punën, siç dëshironin ata të ndodhte, besnike ndaj bindjeve të mia dhe duke mbrojtur atë që mendoj, pa u helmuar nga të tjerët.

Ju ftoj ta ndaloni së derdhuri urrejtjen tuaj mbi njerëz që nuk i njihni fare, shkoni të informoheni dhe edukoheni, mos të keni nevojë ta kafshoni gjuhën që ndonjëherë helmon. Jetë të lumtur!"