Kina e kundërshton fuqimisht vendosjen nga Shtetet e Bashkuara të "tarifave reciproke" ndaj partnerëve të tyre tregtarë dhe do të marrë kundërmasat e nevojshme për të mbrojtur të drejtat dhe interesat e veta të ligjshme, tha të enjten zëdhënësi i Ministrisë së Jashtme kineze.

Ai i bëri këto komente pasi ShBA-ja njoftoi të mërkurën që do të vendosë "tarifa reciproke" ndaj partnerëve të saj tregtarë, duke përfshirë 34 për qind ndaj Kinës.

Pala kineze e ka theksuar vazhdimisht që nuk ka fitues në luftërat tregtare e tarifore dhe se proteksionizmi është pa rrugëdalje, tha zëdhënësi Guo Jiakun në një konferencë të rregullt shtypi.

Nën petkun e "reciprocitetit" ShBA-ja ka vënë tarifa mbi produktet që importon nga shumë vende, duke përfshirë Kinën, gjë që është një shkelje serioze e rregullave të OBT-së dhe dëmton rëndë sistemin e tregtisë shumëpalëshe bazuar në rregulla, vuri në dukje ai.

Zëdhënësi e nxiti palën amerikane të ndreqë praktikat e gabuara dhe t’i zgjidhë dallimet tregtare nëpërmjet konsultimeve me vendet e mbarë botës, duke përfshirë Kinën, mbi bazën e barazisë, respektit dhe dobisë së ndërsjellë.