Washington- Presidenti amerikan Donald Trump ka prezantuar sot “Kartën e Artë”, e cila u siguron milionerëve të huaj rrugën drejt nënshtetësisë amerikane.

Duke mbajtur premtimin e tij se do ta bënte të lehtë nënshtetësinë amerikane, presidenti Donald Trump zbuloi dizajnin e kartës së re – prej 5 milionë dollarësh të administratës së tij.

Presidenti Trump tha se ai ishte blerësi i parë i “Kartës së Artë” që mban një foto dhe gjithashtu firmën e tij.

“Për 5 milionë dollarë, kjo mund të jetë e juaja”, u tha Trump gazetarëve.

Kjo “Kartë e Artë” do të zëvendësojë programin e vizave EB-5, e cila u jep mundësinë shtetasve të huaj që kanë investuar rreth 1 milion dollarë në SHBA – për të marrë një kartë jeshile.

Tani, kushdo që paguan 5 milionë dollarë mund të blejë “Kartën e Artë” dhe të marrë privilegjet e kartonit jeshil.

“Karta e Artë” përmban foton e Donald Trump e bërë në një gjykatë në Atlanta gjatë fushatës së tij për rizgjedhje.

Pas tij qëndron Statuja e Lirisë dhe mbi të është shkruar ‘The Trump Card’.

Dizajni i kartës së re është ngjyrë floriri, e gdhendur me portretin e fytyrës së Donald Trump, pas tij qëndron Statuja e Lirisë dhe mbi të është shkruar ‘The Trump Card’.

Pas prezantimit, manjati shpjegoi se do të dalë në shitje në javët e ardhshme: “Do të mund të shesim miliona të tilla. Edhe për oligarkët rusë, ndoshta: unë njoh disa oligarkë rusë që janë njerëz shumë të mirë", tha presidenti.

Projekti pritet të hyjë në fuqi në javët e ardhshme, ndërsa detajet zyrtare pritet të bëhen publike së shpejti.

“Karta e Artë” vjen pas njoftimit të luftës masive tarifore, në të cilën SHBA-ja taksoi pothuajse 60 vende, duke filluar nga 10 për qind dhe duke u shtrirë deri në rreth 50 për qind.

Në një postim në “Truth Social”, Trump la të kuptohet se ky ishte një operacion vendimtar në SHBA.

Çfarë ofron “Gold Card”?

Qëndrim të përhershëm në SHBA për investitorët që paguajnë 5 milionë dollarë.

Proces më i lehtësuar drejt shtetësisë amerikane, pa ndjekur rrugën e zakonshme shumëvjeçare.

Përjashtim nga disa taksa, përfshirë ato mbi të ardhurat e fituara jashtë SHBA-së.

Sipas Sekretarit të Tregtisë, Howard Lutnick, kjo kartë do të zëvendësojë programin ekzistues EB-5, i cili aktualisht kërkon investime prej rreth 800,000 deri në 1 milion dollarë në projekte që krijojnë vende pune në SHBA.

Trump u shpreh optimist për suksesin e këtij programi, duke pretenduar se miliona karta të tilla mund të shiten, përfshirë edhe për biznesmenë dhe oligarkë ndërkombëtarë.

Nisma ka ngjallur debat, pasi shikohet si një mënyrë për të “blerë” nënshtetësinë amerikane, në një kohë kur emigrantët e zakonshëm përballen me procedura të gjata dhe të ndërlikuara.

Kritikët e konsiderojnë këtë politikë si përjashtuese, që mund të hapë derën për ndikime të huaja në politikën dhe ekonominë amerikane.

Megjithatë, përkrahësit argumentojnë se nisma mund të sjellë rritje të investimeve të huaja dhe të ndihmojë ekonominë e vendit.