Barcelona është në garë për gjithçka dhe tifozët kanë filluar të ëndërrojnë hapur për një tjetër tripletë historike, si ato të viteve 2009 dhe 2015. Por Hansi Flick, i cili e ka përjetuar vetë madhështinë e një sezoni perfekt me Bayernin, e di mirë se lavdia kërkon përqendrim maksimal.

Pas sigurisë së finales së Kupës së Mbretit dhe kryesimit në La Liga, blaugranat vazhdojnë rrugëtimin edhe në Champions League. E megjithatë, para sfidës me Betis, trajneri Flick i uli tonet. Në konferencën për shtyp, trajneri gjerman u shpreh qartë:

“Nuk e di çfarë ëndërron presidenti Laporta, por shpresoj që të ketë ëndrra të bukura. Unë dua t’i fitoj të gjitha ndeshjet. Objektivi ynë është të luajmë edhe 15 ndeshje në këtë sezon. Nëse ia dalim, do të thotë që kemi bërë një sezon të jashtëzakonshëm”.

Matematika është e thjeshtë: 9 ndeshje në kampionat, 1 finale e Kupës dhe potencialisht 5 ndeshje në Champions (nëse Barça arrin finalen). Një mision i vështirë, por jo i pamundur për një ekip që ka rigjetur identitetin. Vetëbesim ka, por duhet përqendrim. Flick nuk dëshiron të humbasë fokusin, e bën të qartë për lojtarët dhe opinionin publik se titujt nuk fitohen me iluzione:

“Të mendosh për tripletën është bukur, por nuk mund të fokusohemi vetëm tek ëndrrat. Vetëbesimi i lojtarëve është i lartë, por detyra ime është të sigurohem që ata japin maksimumin në çdo ndeshje. Jemi duke luftuar për gjithçka, besojmë dhe kemi angazhimin maksimal të lojtarëve. Sidoqoftë, nevojitet më shumë se kaq, kemi nevojë edhe për tifozët. Është një situatë entuziazmuese, por duhet të qëndrojmë të përqendruar”.

Pra, në kërkim të madhështisë, por me këmbë në tokë. Barcelona është në rrugën e duhur për të shkruar historinë, por për Flick nuk ka vend për eufori. Për të, çdo ndeshje është finale. Tripleta është një ëndërr, por vetëm për ata që nuk harrojnë të fitojnë sot…, pa menduar shumë për nesër.