Kjo e premte në shtëpinë e Manchester City ishte dita e lamtumirës së Kevin De Bruyne. Ndër shumë reagime, edhe trajneri Pep Guardiola foli në konferencë për shtyp: "Është një ditë e lumtur, për kënaqësinë që kam pasur, duke jetuar tërë këtë kohë me të. Nuk harrohen kurrë gjithçka që na ka dhënë, njerëzillëku dhe ndikimi i tij në sukseset tona gjatë dekadës së fundit.

Do të kishte qenë e pamundur pa të. Njëherazi është një ditë e trishtuar, sepse është pjesë e jona dhe po largohet. Hidhërimi është ashtu si kur u larguan Kompany, Agüero apo David Silva… Ka edhe emra të tjerë, këta janë vetëm tre shembuj. Është një ditë e trishtuar, po. Kanë mbetur edhe 10 ndeshje, shpresoj që të jenë 11.

6 prej tyre do t’i luajmë në shtëpi, shpresoj që tifozët t’i ofrojnë De Bruyne dashurinë dhe vlerësimin që meriton. E rëndësishme është që ai të ndihet mirë. Kemi folur me Kevin, kishte disa probleme, por tani, pas operacioneve dhe shqetësimeve fizike, ndihet më mirë. Atij dhe familjes së tij i urojmë gjithë të mirat".

Ja njoftimi i De Bruyne për largimin në fund të këtij sezoni nga “Etihad”:

"I dashur Manchester City, duke parë këtë mesazh, ndoshta tashmë e kupton se ku dua të dal. Prandaj do të shkoj drejt e në temë: këto do të jenë muajt e mi të fundit si lojtar i Manchester City. Nuk është e lehtë t’i shkruaj këto fjalë, por si futbollistë të gjithë e dimë që, më herët apo më vonë, ky moment vjen. Momenti ka ardhur dhe e meriton ta dëgjosh drejtpërdrejt nga unë.

Futbolli më solli tek ju dhe në këtë qytet. Ndërsa ndiqja ëndrrën time, nuk mund ta imagjinoja që ky rrugëtim do të më ndryshonte jetën. Ky qytet, ky klub, këta njerëz… më kanë dhënë GJITHÇKA. Nuk mund të bëja gjë tjetër veçse t’ia ktheja duke dhënë GJITHÇKA në fushë.

Dhe e dini çfarë? I kemi fituar TË GJITHA. Na pëlqen apo jo, ka ardhur momenti të përshëndetemi. Suri, Rome, Mason, Michèle dhe unë jemi jashtëzakonisht mirënjohës për gjithçka që ka përfaqësuar ky vend për familjen tonë. ‘Manchester’ do të jetë gjithmonë e shkruar në pasaportat e fëmijëve tanë dhe, ajo që ka më shumë rëndësi, do të mbetet përgjithmonë në zemrat tona.

Kjo do të jetë gjithmonë SHTËPIA jonë. Nuk mund ta falënderojmë mjaftueshëm qytetin, klubin, stafin, shokët e skuadrës, miqtë dhe familjen për këtë udhëtim të jashtëzakonshëm që zgjati 10 vite. Çdo histori e ka një fund, por ky ka qenë pa dyshim kapitulli më i bukur i karrierës sime. Le t’i shijojmë bashkë këto momente të fundit. Me dashuri, Kevin".