Napoli vazhdon të ndjekë Interin në garën për titullin kampion. Falë fitores kundër Milanit në "Maradona", në ndeshjen e parë pas angazhimeve të kombëtareve, ekipi i Antonio Contes ruan diferencën prej tri pikësh nga kryesuesit zikaltër.

Kapiteni i Napolit, Giovanni Di Lorenzo, foli për ambiciet e ekipit të tij në një intervistë për “Radio Kiss Kiss Napoli”: "Kanë mbetur edhe 8 ndeshje, duhet të qëndrojmë pranë Interit në klasifikim, duke shpresuar ndoshta në një hap fals të zikaltërve”.

Di Lorenzo theksoi se prioriteti kryesor është që Napoli të vazhdojë rrugëtimin e tij: "Fitorja kundër një kundërshtari të fortë si Milani ishte thelbësore. Kishim nevojë për këtë fitore pas barazimit me Venezian".

Kapiteni foli edhe për ndikimin e Romelu Lukakut te blutë: "Romelu është një djalë i jashtëzakonshëm. Është përshtatur shumë mirë me grupin, përvoja e tij ndihet në fushë".

Me kampionatin që hyn në fazën vendimtare, Napoli shpreson të mbajë presionin mbi Interin dhe të përfitojë nga çdo gabim i zikaltërve për t’u rifutur në garën për titullin kampion.