Në një sezon ku Bundesliga është bërë e parëndësishme, Borussia Dortmund ka arritur në çerekfinalet e Ligës së Kampionëve për të dytin vit radhazi dhe po përgatitet të përballet me Barcelonën. Synimi është për të arritur gjysmëfinalet.

Ndeshja e parë do të luhet në Spanjë më 9 prill, por në pritje të kthimit në shtëpi, më 15 po të këtij muaji, tifozët e skuadrës së Niko Kovac kanë filluar të ngrohin zërin për t’i shtyrë përpara idhujt e tyre. Parashikimi për një stadium të mbushur plot në “Signal Iduna Park” është i sigurt, madje duket se do të duheshin ndërtuar edhe dy impiante të tjera për të pritur të gjithë tifozët që dëshirojnë ta ndjekin këtë supersfidë.

Siç raporton “Marca”, këto ditë janë regjistruar kërkesa masive për bileta. Megjithëse stadiumi i skuadrës gjermane ka një kapacitet prej 81.365 spektatorësh, kërkesa për bileta që ka marrë Borussia Dortmund e ka tejkaluar shumëfish këtë shifër, duke arritur në 300 mijë.

Hansi Flick dhe Lamine Yamal janë të paralajmëruar; muri i famshëm i verdhë po përgatit një ferr të vërtetë për t’i pritur në mënyrën e vet yjet katalanas dhe për të qenë, si gjithmonë, lojtari i 12-të me fanellën verdhezi.