Zlatan Ibrahimovic u rikthye disa ditë më parë në Milanello, pas një mungese të gjatë. Përpara ndeshjes kundër Napolit, të cilën të tijtë e humbën 2-1, shpjegoi arsyen e kësaj periudhe të gjatë larg “Djallit”: "E vërteta është se nuk isha mirë, më kapi një virus dhe humba tre kilogramë në peshë. Tani ndihem mirë, jam i pranishëm, ndodhem këtu për ta ndihmuar Milanin brenda dhe jashtë fushës".

E pashmangshme të flitej prej tij për zgjedhjen e drejtorit sportiv, një temë kryesore për Milanin në këtë periudhë: "Flitet shumë për figurën e drejtorit sportiv, por ne jemi të bashkuar, punojmë së bashku dhe po përpiqemi të kuptojmë çfarë nevojitet dhe çfarë jo. Është e pavërtetë që jam grindur me Furlani, flasim çdo ditë për gjithçka. Unë jam këtu për të ndihmuar dhe shpresoj që gjërat të shkojnë më mirë".

Në fund, suedezi tregoi një histori të vogël nga e kaluara e tij si lojtar: "Pesë-gjashtë vite më parë isha afër kalimit te Napoli, por kjo është e shkuara. Është e vërtetë që kam bërë një xhiro me motor në qytet, bashkë me Cannavaro. Në ndeshjen time të fundit këtu shënova dy gola".