Me dominimin e zakonshëm, me të cilin i ka shkatërruar kundërshtarët këtë sezon, Barcelona e Hansi Flick u shfrenua kundër Girona, duke e mposhtur thellë 4-1 këtë kundërshtar. Kësisoji, skuadra katalanase ka ruajtur distancën prej 3 pikësh ndaj Real Madridit, si kryesuese e La Liga.

Trajneri gjerman nuk e fshehu lumturinë e tij për rezultatin dhe performancën e skuadrës, duke vlerësuar lojtarët që u përfshinë në rotacion: "Nuk ka rëndësi kush luan, ideja është gjithmonë e njëjtë. Sot kemi bërë një ndeshje të shkëlqyer. Ishte e rëndësishme të riktheheshim me këtë energji pas pushimit. Zëvendësimet funksionuan dhe jam i lumtur".

Flick theksoi se për të, goli i parë i ndeshjes "është i Lamine Yamal" dhe veçoi dy emra të rëndësishëm në sulm: "Lewandowski është shumë i rëndësishëm, ka shënuar gola vendimtarë këtë sezon. Nuk më pëlqen të flas për lojtarët individualisht, por ai është i veçantë, në zonë është shumë i mirë. Gjithashtu, jam shumë i lumtur për Ferran Torres. Ai po shënon gola dhe është shumë i rëndësishëm për ne".

Për më tepër, trajneri gjerman theksoi se edhe kundërshtari luan dhe se gjatë një ndeshjeje mund të ketë momente pasigurie, siç ndodhi pas golit të barazimit: "Është normale, sepse Girona gjithashtu luan futboll, di si të luajë me topin. Ata janë një ekip i mirë. Në atë moment ishte diçka e zakonshme dhe mund të ndodhë, siç ndodhi sot".