Skandal ushqimor në Tiranë: Produkte me salmonelë futen në treg, në kërkim administratori i kompanisë – procedohen penalisht inspektorë të AKU

Tiranë – Seksioni për Hetimin e Krimit Ekonomik dhe Financiar në DVP Tiranë, në bashkëpunim me Prokurorinë e Juridiksionit të Përgjithshëm, ka zbuluar një rast të rëndë që rrezikonte shëndetin e qytetarëve. Një kompani private ka importuar produkte ushqimore që, sipas analizave laboratorike, rezultuan me përmbajtje të bakterit të rrezikshëm të salmonelës.

Administratori i kompanisë, Arben Goxha, 50 vjeç, është shpallur në kërkim, ndërsa vëllai i tij, Mondi Goxha, 53 vjeç, është proceduar penalisht. Të dy akuzohen për veprën penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.

Po ashtu, janë proceduar penalisht edhe tre inspektorë të Autoritetit Kombëtar të Ushqimit (AKU): Gëzim Hushi, 38 vjeç, Sada Lufta, 42 vjeçe, dhe Aldo Sinjari, 46 vjeç, të cilët akuzohen për “Shpërdorim detyre”, pasi me veprimet ose mosveprimet e tyre kanë lejuar futjen në treg të këtyre produkteve të rrezikshme.

Materialet hetimore i janë kaluar Prokurorisë së Tiranës për veprime të mëtejshme ligjore.

Ky rast ngre shqetësime serioze mbi kontrollin e sigurisë ushqimore në vend dhe rolin e institucioneve përgjegjëse.