Vincent Kompany, trajneri i Bayern Munich, foli në konferencë për shtyp në prag të ndeshjes kundër St.Pauli: "Është për të ardhur keq që Davies dhe Upamecano nuk mund të jenë pjesë e skuadrës në këtë moment kaq të rëndësishëm të sezonit për shkak të dëmtimeve.

Kemi pasur mungesa këtë sezon, por gjithmonë ia kemi dalë deri tani. Shpresoj që kjo të ndihmojë në forcimin e grupit. Mënyra se si reagojmë ndaj mungesave me peshë si këto është shumë e rëndësishme.

Nuk ka justifikime për mua, – shtoi trajneri belg, – gjithmonë dua të fitoj ndeshjen e radhës. Duhet të përqendrohesh shpejt te ajo që mund të kontrollosh. Jemi në një situatë ku nuk ka hapësirë për hapa fals. Do të bëjmë gjithçka të mundshme për t’i arritur objektivat tona".

Sa i përket betejës me Bayer Leverkusen për titullin kampion në Gjermani, Kompany u shpreh: "Leverkusen? Qasja jonë është sikur të kishim të njëjtën sasi pikësh. E marrim të mirëqenë që Leverkuseni do t’i fitojë të gjitha ndeshjet e mbetura, prandaj duhet t’i fitojmë edhe ne të gjitha, tonat.

Gjëja më e mirë për të bërë është të fshijmë gjithçka dhe të supozojmë se ata do të fitojnë 8 ndeshjet e ardhshme. Atëherë, duhet të fitojmë edhe ne 8 ndeshje. Ky është një lloj presioni i mirë. Ky duhet të jetë mentaliteti ynë në ndeshjet e fundit të sezonit".