Vlorë/ Shoferi i dehur përplas disa automjete dhe tenton t’i ikë policisë – kapet pas ndjekjes spektakolare

Ngjarja që raportoi më herët noa.al, sonte në Vlorë, kishte protagonist një të ri në gjendje të dehur, i cili shkaktoi aksidentin zinxhir me disa makina, përplasi një grua dhe goditi edhe dy makina policie.

Gjithçka ndodhi këtë mbrëmje në rrethrrotullimin e Çoles, lagjja "1 Maji", ku një 34-vjeçar, duke drejtuar një automjet tip “Benz” në gjendje të dehur, ka shkaktuar një aksident zinxhir, duke goditur disa mjete dhe më pas ka tentuar të largohet me shpejtësi nga vendi i ngjarjes.

Gjatë përpjekjes për t’u larguar, ai ka përplasur edhe një tjetër automjet, të drejtuar nga një grua 50-vjeçare, e cila ndodhet në spital jashtë rrezikut për jetën.

Policia është vënë menjëherë në ndjekje të 34-vjeçarit K. Ll., i cili ka kryer manovra të rrezikshme, duke goditur dy automjete të Policisë dhe vënë në rrezik jetën e efektivëve.

Pas ndjekjes spektakolare, ai është ndaluar në një zonë jashtë qendrave të banuara, duke shmangur rrezikun për qytetarët dhe drejtuesit e tjerë të mjeteve.

I arrestuari është shoqëruar në komisariat, ndërsa hetimet vijojnë për dokumentimin e plotë të kësaj ngjarjeje. /noa.al

View this post on Instagram

A post shared by Agjencia Kombëtare e Lajmeve NOA (@noanews)