Kryetari i Bashkisë së Matit Agron Malaj ka dhënë dorëheqjen ditën e sotme nga posti që mbante. Ai ka deklaruar se do të garojë në zgjedhjet e 11 majit për të fituar mandatin e deputetit.

Agron Malaj është kryetari aktual i Bashkisë së Matit, i cili mori detyrën më 2 gusht 2019, pas zgjedhjeve lokale të 30 qershorit 2019.

Në fillim të mandatit të tij, pati debate lidhur me një dënim të mëparshëm për armëmbajtje pa leje në vitin 1999. Megjithatë, Komisioni Qendror i Zgjedhjeve (KQZ) vendosi ta rikonfirmojë atë në detyrë, duke argumentuar se kishin kaluar gati 20 vite nga momenti i dënimit dhe, sipas ligjit, atij nuk i ndalohej të mbante pozicione drejtuese.

Gjatë mandatit të tij, Malaj ka ndërmarrë disa projekte për përmirësimin e infrastrukturës dhe shërbimeve në Bashkinë e Matit. Këto përfshijnë ndriçimin e rrugëve kryesore të qytetit të Burrelit, përmirësimin e furnizimit me ujë të pijshëm për qytetarët, asfaltimin e rrugëve në zona rurale si Bushkashi dhe Batrra e Vogël, si dhe rehabilitimin e objekteve kulturore dhe sportive, si Pallati i Kulturës “Shefqet Doda” dhe stadiumi “Liri Ballabani”.

Gjithashtu, është vënë re një angazhim në përmirësimin e infrastrukturës arsimore, me investime në shkolla si “Pjetër Budi”, “28 Nëntori” dhe “Mustafa Gjestila”, duke i bërë ato të krahasueshme me shkollat e Tiranës.