Tiranë, 24 mars 2025 – Kombëtarja shqiptare ka arritur fitoren e parë në kualifikueset për Botërorin 2026, duke mundur Andorrën me një goleadë të pastër 3-0 në një ndeshje të dominuar nga kuqezinjtë. Pas humbjes ndaj Anglisë në Wembley, Shqipëria është rikthyer fuqishëm, duke e shfrytëzuar maksimalisht mundësinë për të marrë tri pikët e para në këto eliminatore.

Ndeshja ka nisur vrullshëm për Shqipërinë, që ka kërkuar menjëherë të imponojë lojën e saj. Minuta e 9-të sjell golin e avantazhit për kuqezinjtë, kur një goditje dënimi nga e djathta e krosuar perfekt nga Asllani gjen sulmuesin Rey Manaj, i cili me kokë e dërgon topin në rrjetë.

Në minutën e 20, Shqipëria gjen edhe golin e dytë pas një aksioni të shkëlqyer. Armando Broja merr një top të shpërndarë nga e djathta, kalon mbrojtësin e Andorrës dhe e dërgon topin për Manaj, i cili nuk fal dhe e çon rezultatin në 2-0. Ky gol i dyti për Manajn i ka dhënë një kuptim më të madh fitores, duke e çuar sulmuesin e Sivasspor në 10 gola me fanellën kuqezi, duke barazuar legjendat Sokol Kushtan dhe Igli Taren.

Shqipëria kontrolloi lojën në 45 minutat e para, me Andorrën që mundi vetëm të mbrohej. Asllani tentoi dy herë nga distanca, por pa mundur të gjejë golin. Pjesa e parë mbyllet me avantazhin 2-0 për Shqipërinë.

Në pjesën e dytë, Shqipëria ruajti ritmin e saj të lartë dhe vazhdoi të dominojë në lojë. Rey Manaj u afrua sërish tek goli, por fatkeqësisht, nuk arriti të shënonte. Ndërkohë, Myrto Uzuni zëvendësoi Armando Brojën dhe pati mundësinë të kontribuonte, ku në fund të ndeshjes shënoi golin e tretë për të vulosur triumfin 3-0.

Fitorja e parë në këto eliminatore e ngjit Shqipërinë në vendin e dytë në Grupin K pas dy ndeshjeve të para. Me tri pikët e fituara, ekipi i trajnerit Sylvinho tashmë e ka mendjen tek ndeshja e radhës e shumëpritur ndaj Serbisë në qershor.