Berat – 37-vjeçari godet me thikë një 85-vjeçar në lokal, policia në kërkim të autorit

Një ngjarje e rëndë ka ndodhur mbrëmjen e sotme rreth orës 19:00 në lagjen Çelepias të qytetit të Beratit, ku një konflikt në ambientet e një lokali ka përfunduar me plagosje.

Sipas burimeve paraprake, shtetasi A. F., 37 vjeç, ka goditur me mjet prerës (thikë) shtetasin T. B., 85 vjeç, pas një konflikti për motive të dobëta.

I moshuari është transportuar në spital dhe ndodhet nën kujdesin e mjekëve.

Policia ka shkuar në vendngjarje dhe po vijon krehjen e zonës për të bërë të mundur kapjen e autorit të dyshuar, i cili është larguar pas ngjarjes.

Grupi hetimor po punon për zbardhjen e plotë të rrethanave dhe motivit të ngjarjes, raporton noa.al.