Surprizë në kombëtaren argjentinase. Lionel Messi është “përjashtuar” nga lista për dy ndeshjet e radhës kualifikuese të Kupës së Botës 2026 për shkak dëmtimi. Ai nuk do të marrë pjesë në sfidat klasike kundër Uruguajit dhe Brazilit.

Edhe pse e përfundoi ndeshjen e së dielës me Inter Miami, duke shënuar një supergol dhe ndihmuar ekipin e tij të fitonte 2-1 ndaj Atlanta United, "La Pulga" ndjeu shqetësime muskulore, çka ngriti alarmin te stafi mjekësor.

Për të shmangur përkeqësimin e problemit dhe mos rrezikuar një dëmtim më të rëndë, sipas “TyC Sports”, 37-vjeçari nga Rosario do të qëndrojë në SHBA për t’u rikuperuar dhe nuk do të jetë në dispozicion të trajnerit Lionel Scaloni.

Lajmi është një goditje e madhe për Argjentinën, duke marrë parasysh rëndësinë e këtyre dy ndeshjeve në rrugëtimin drejt Botërorit 2026. Aktualisht, Albiceleste kryeson me 25 pikë, 5 pikë më shumë se Uruguaji dhe 7 pikë më shumë se Brazili.

Si ndodhi dëmtimi? Pas një goditjeje me të majtën ndaj Atlanta United, ylli argjentinas ndjeu dhimbje në zonën e aduktorëve, duke shfaqur shqetësim, por gjithsesi vazhdoi të luante. Ish-ylli i Barcelonës ka qenë në kontakt të vazhdueshëm me stafin mjekësor të Argjentinës dhe dje iu nënshtrua ekzaminimeve, të cilat konfirmuan dëmtimin muskulor.

Në këtë mënyrë, ai i shtohet listës së të dëmtuarve te kampionët e botës në fuqi, ku tashmë janë Paulo Dybala, Gonzalo Montiel, Giovani Lo Celso dhe Lisandro Martinez.

Vetë Leo Messi ka dalë me deklaratë rreth lëndimit të pësuar fundjavën e kaluar: “Jam i trishtuar t’i humbas këto ndeshje të rëndësishme ndaj Uruguajit dhe Brazilit me Argjentinën.

Doja shumë të luaja për ekipin kombëtar, por një dëmtim i vogël më detyron të pushoj pak, kështu që nuk mund të jem atje. Do t’ju mbështes dhe brohoras nga këtu si çdo tifoz tjetër. Forca Argjentina!”