Ai ishte njeriu më i shumëpritur në "Le Classique", të luajtur të dielën dhe humbur nga Marseille i tij me rezultatin 3-1. Adrien Rabiot u rikthye si ish-lojtar në “Parc des Princes” dhe, natyrisht, nuk u prit mirë nga tifozët e PSG-së, të cilët e fyen verbalisht dhe shfaqën pankarta të dënueshme, ku u përfshi edhe nëna e tij, njëkohësisht agjentja e tij, Veronique.

Spikeri i stadiumit e ftoi disa herë publikun të mos këndonte kore kundër mesfushorit dhe të hiqte pankartat e vendosura në sektorin më të zjarrtë të tifozerisë pariziene, me përmbajtje qartësisht fyese: "Besnikëria është për burrat, tradhtia për kur*at. E tillë nëna, i tillë djali".

Ish-lojtari i Juventusit reagoi dje ndaj këtij episodi dhe sulmoi ashpër Nasser Al-Khelaïfi, të cilin e konsideron fajtor për lejimin e ekspozimit të këtyre pankartave në stadium. "Fyerja e një nëne dhe e një babai të ndjerë… Gjithçka e ka një çmim, një ditë…, – ka shkruar mesfushori në mesazhin e publikuar në Instagram. – Nasser, mund të kesh gjithë paratë e botës, madje edhe më shumë, por klasi nuk blihet".

Nuk ka vonuar mbështetja e kryetarit të bashkisë së Marseille për të: "Sulmet e drejtpërdrejta ndaj Adrien Rabiot dhe familjes së tij janë të patolerueshme. Mbështetja ime është e plotë për lojtarin dhe nënën e tij. Kjo lloj sjelljeje është e papranueshme. Futbolli duhet të na bashkojë gjithmonë. Kërkoj reagim të qartë nga Ligue 1 dhe PSG".