Një ngjarje e pazakontë ka tronditur autoritetet në SHBA, ku Sobuza Uilliams nga San Francisco ka marrë mbi 150 gjoba, me një vlerë totale prej 28 mijë dollarësh, për një makinë që ai nuk e zotëron më. BMW X3 i vitit 2008 është gjobitur për çdo lloj shkeljeje të mundshme, nga mospagesa e taksës së rrugës deri te parkimi në trotuar, edhe pse Uilliams e kishte shitur këtë automjet në vitin 2023 për vetëm 1000 dollarë.

Problemi ka lindur nga një gabim burokratik. Edhe pse makina u shit dhe Uilliams e dorëzoi tek një mik, procesi i transferimit të pronësisë nuk u përfundua kurrë. Për këtë arsye, gjobat kanë vazhduar të mbledhen në emrin e tij, pasi autoritetet e Kalifornisë nuk kanë përpunuar dokumentet e nevojshme që do ta lirojnë nga përgjegjësia.

Uilliams e pranon se mund të kishte qenë më i kujdesshëm në këtë situatë, por ai thekson se autoritetet e shtetit nuk e kanë përpunuar dokumentin kyç që do ta lironte nga këto detyrime financiare. Ai e shiti makinën për 1000 dollarë dhe u mor vesh me mikun e tij për dorëzimin e saj. Miku i dha paratë menjëherë në dorë, por e mori makinën dhe e ngiste atë pa përfunduar dokumentacionin përkatës.

Në fillim, Uilliams paguante gjobat, por pasi kostoja u bë e papërballueshme, ai kërkoi që miku i tij të përfundonte transferimin e pronësisë. Megjithatë, ai nuk e bëri këtë dhe nuk e rregulloi situatën, duke e lënë Uilliamsin të përballet me një barrë të rëndë financiare.

Të gjitha dokumentet nga ana e Uilliams janë plotësuar dhe dorëzuar te institucionet përkatëse, por tani gjithçka varet nga miku që ka blerë makinën dhe që ende nuk ka marrë masa për të përmbyllur transferimin e pronësisë. Për momentin, Uilliams nuk ka asnjë mundësi tjetër përveçse të presë që miku të përfundojë këtë procedurë dhe të lirohet nga detyrimet e shumta që janë krijuar për shkak të burokracisë.