TIRANË – Erion Veliaj del nga SPAK pas 5 orësh dëshmie, qytetarë protestojnë jashtë godinës

Kryebashkiaku i Tiranës, Erion Veliaj, ka dalë nga ambientet e Prokurorisë së Posaçme (SPAK) pas një qëndrimi prej afro pesë orësh. Ai mbërriti në institucion rreth orës 09:00 të mëngjesit dhe doli nga godina rreth orës 14:00, pa dhënë deklarata për mediat. “Do t’ju shpjegoj nga mbledhja e Këshillit Bashkiak live,” u shpreh shkurtimisht Veliaj, duke shmangur pyetjet e gazetarëve.

Gjatë kohës që ai dëshmonte para prokurorëve, jashtë godinës së SPAK-ut ishte mbledhur një grup qytetarësh protestues, që mbanin pankarta dhe kërkonin largimin e tij nga posti. Në momentin e daljes së kryebashkiakut, efektivët e njësisë “Shqiponja” formuan një kordon sigurie për të shmangur përplasjet mes protestuesve dhe eskortës së tij.

Kjo është hera e dytë brenda pak javësh që Veliaj thirret nga SPAK. Më 24 dhjetor ai ishte ftuar për t’u marrë në pyetje, por kërkoi shtyrjen e seancës për ditën e enjte, kërkesë që u pranua nga prokurorët.

Ngjarja vjen pas zhvillimeve të fundit në hetimin pasuror dhe penal që po kryen SPAK ndaj kryebashkiakut dhe personave të lidhur me të. Bashkëshortja e tij, Ajola Xoxa, u mor në pyetje për rreth tre orë mbrëmjen e së hënës, në kuadër të hetimeve mbi pasuritë dhe aktivitetet financiare të familjes Veliaj.

Të martën, Gjykata e Posaçme e Apelit rrëzoi ankesën e avokatëve të Xoxës dhe kunatit të saj, Arbër Veliaj, duke lënë në fuqi vendimin e GJKKO-së që lejoi kontrollin në banesat dhe zyrat e tyre.

Ndërkohë, mëngjesin e 6 dhjetorit, me urdhër të Gjykatës së Posaçme kundër Korrupsionit dhe Krimit të Organizuar, oficerët e policisë gjyqësore ushtruan kontrolle në zyrat e kompanisë së bashkëshortes së Veliajt, ku më herët ishte sekuestruar edhe telefoni i saj personal. Po atë ditë, kontrolle u kryen edhe në banesën e vëllait të kryebashkiakut.

Edhe pse SPAK nuk ka dhënë detaje zyrtare mbi ecurinë e hetimeve, mësohet se procedimi penal lidhet me dyshimet për pasuri të pajustifikuara, si dhe me hetimin për inceneratorin e Tiranës dhe për kompaninë “5D”, që zotërohej nga ish-drejtorë të Bashkisë së Tiranës.

Në reagimin e tij të mëparshëm, Veliaj ka deklaruar se mbështet çdo hap të Prokurorisë, duke theksuar se është i gatshëm të bashkëpunojë plotësisht me drejtësinë.