Në tetë muajt e parë mbi 8 milionë turistë. Në aeroportin e Tiranës ka pasur 3.5 milionë udhëtarë në qershor-gusht (+46%). Shumë italianë. Por rritjet e çmimeve në plazhe kanë zemëruar edhe kryeministrin Edi Rama: “Kjo është vetëvrasje”

Shqipëria mbyll sezonin veror me një tjetër rekord turistësh të huaj, sidomos nga plazhet në jug të vendit tonë. Por, rritja e ndjeshme e çmimeve të shërbimeve të ofruara në disa zona – deri në 90% krahasuar me një vit më parë – ka pasur shumë pasoja në kohëzgjatjen e qëndrimit, shpenzimet e përgjithshme dhe vendndodhjet e zgjedhura për pushime.

Shumë punonjës flasin për rrezikun për të bërë “të njëjtat gabime pas Covid-it si Italia, Kroacia dhe Greqia”, kur çmimet u rritën shumë më tepër se norma e inflacionit, duke dekurajuar mijëra turistë. Ky është bilanci i parë i medias së njohur italiane Corriere-s, duke ndërthurur të dhënat zyrtare, numrat e operatorëve në sektor dhe ata të grumbulluar në terren.

Bumi i fluturimeve me kosto të ulët

Bumi i fluturimeve me kosto të ulët – falë Wizz Air dhe Ryanair – ka “vjedhur” vëllime pasagjerësh nga tragetet midis Italisë dhe Durrësit. Nëse, në periudhën qershor-gusht udhëtarët portualë ishin pak më të ulët se ata të një viti më parë, 3.5 milionë pasagjerë kaluan nga aeroporti ndërkombëtar i Tiranës, 45.8% më shumë se tremujori i 2023. “Nga këta, 1,35 milionë fluturuan ndërmjet Italisë dhe Shqipërisë, një rritje prej 47% krahasuar me një vit më parë”, shpjegon për Corriere, Piervittorio Farabbi, drejtues operativ dhe menaxher përgjegjës për Shqipërinë. “Nga 1 janari deri më 10 shtator kemi pasur 7,6 milionë pasagjerë – llogarit Farabbi – tashmë i kemi tejkaluar shifrat për të gjithë vitin 2023 dhe presim ta mbyllim vitin me 10,5 milionë”.

Akuzat

Por, më shumë se një turist u shpreh se gjatë pushimeve në jug, shpenzuan shuma të barabarta me ato në Itali, me rritje që varionin nga 5 në 90%, veçanërisht në Ksamil, Sarandë, Vlorës Himarë, Dhërmi, Velipojë, zona të “pushtuara” nga italianët që në vitin 2023. Kjo ka zemëruar vetë shqiptarët të cilët e gjetën veten të detyruar të paguanin shuma të papara për një çadër, një drekë apo një dhomë hoteli. Dhe kjo e shtyu kryeministrin Edi Rama të ngrejë zërin në korrik: “Në jug po shohim një rritje absurde. Kjo është vetëvrasje, rritjet e çmimeve do të kenë pasoja në verën e vitit 2025. Dhe është turp, që kjo po ndodh kur ne kemi hyrë në ‘Champions League’ të turizmit mesdhetar”.

Krahasimi

Vëzhguesit vendas janë ata që bëjnë llogaritë, duke ngritur alarmin pikërisht në jug. Në jug, banesat më të përballueshme, të cilat vitin e kaluar ishin 25-30 euro, në periudhën dymujore korrik-gusht u rritën në 40-45 euro, deri në 100-120 euro. Pa folur për dhomat e hotelit, që kanë arritur në 500 euro.

Pasojat

Pasoja e parë, ndonëse ende me shifra rekord, u vu re në korrik kur – sipas Ministrisë së Turizmit – në Shqipëri hynë 1.8 milionë turistë të huaj, 2.7% më shumë se në korrik 2023, shifër më e vogël se rritja me 25% e shtatë muajve të parë të 2023. Në gusht erdhën edhe 2.2 milionë të tjerë, duke e çuar tetë muajt e parë në 8.5 milionë turistë, një ulje krahasuar me të njëjtin muaj të 2023. Kjo edhe për shkak se është zvogëluar numri i kosovarëve, të cilët këtë vit, falë marrëveshjeve me BE-në, kanë filluar të udhëtojnë më shumë në Europë, pasi kanë frekuentuar Shqipërinë prej vitesh. Ndaj i takonte italianëve të kuptonin se, krahasuar me vitin 2023, pushimet përtej Adriatikut janë bërë më të shtrenjta në Jug dhe kështu kanë favorizuar pjesën tjetër të vendit.

Ku shkojnë turistët

“Turistët nga Europa Qendrore (Poloni, Sllovaki) këtë vit preferuan plazhet e Durrësit dhe Golemit”, arsyeton Farabbi. “Vëmë re një rritje të ndjeshme të vizitorëve, që shkojnë në ekskursione në këmbë ose me biçikletë në veri dhe në përgjithësi shumë shkojnë nëpër zona të tjera, jo vetëm në jug”. / Corriere della Sera