Pas hetimeve disamujore dhe përdorimit të metodave proaktive nën drejtimin e Prokurorisë, Seksioni për Hetimin e Trafiqeve të Paligjshme në bashkëpunim me Forcën Operacionale të DVP Tiranë finalizuan operacionin e koduar “Suspend”, duke goditur një rast të rëndë të trafikimit të armëve të zjarrit me destinacion kryeqytetin.

Në pranga ranë dy shtetas kosovarë: Altin Pajaziti, 23 vjeç, Kadri Prushi, 53 vjeç, të dy banues në Kosovë, të cilët dyshohet se trafikonin armë zjarri drejt Shqipërisë me qëllim shitjen për afro 10 000 euro.

Operacioni u zhvillua në autostradën “Lezhë – Fushë Krujë”, ku u ndalua automjeti me të cilin po udhëtonin të dy të dyshuarit, raporton noa.al.

Gjatë kontrollit, Policia gjeti dhe sekuestroi 2 pistoleta dhe municion luftarak, të cilat dyshohet se ishin destinuar për treg të paligjshëm armësh në Tiranë – me rrezik real për sigurinë publike.

View this post on Instagram

A post shared by Agjencia Kombëtare e Lajmeve NOA (@noanews)

Burime policore theksojnë se qëllimi i trafikut ishte përdorimi i armëve për ngjarje të mundshme kriminale, përfshirë atentate.

Vijojnë hetimet për dokumentimin e plotë të veprimtarisë kriminale dhe për identifikimin e personave të tjerë të përfshirë në rrjetin e trafikimit të armëve.

Materialet procedurale i janë referuar Prokurorisë për veprime të mëtejshme. /noa.al