Katalonjë, 31 mars 2025 – Autoritetet spanjolle kanë çmontuar një grup kriminal shqiptar që vepronte nga disa lokacione, i akuzuar për vepra penale lidhur me lëndët narkotike. Grupi ishte i specializuar në kultivimin dhe shpërndarjen e marijuanës në të gjithë Katalonjën.

Hetimi ka nisur në fund të vitit të kaluar, kur Mossos d’Esquadra (policia katalanase) zbuloi aktivitete të dyshimta në një magazinë industriale në Cervera, në rajonin e Segarrës. Indikacionet fillestare sugjeruan se ishte një plantacion i marijuanës në shkallë të gjerë.

Pas kësaj, u gjet një plantacion i dytë në një magazinë tjetër në Manlleu, Osona. Në të dyja rastet, instalimet elektrike ishin manipuluar për të mashtruar furnizimin me energji elektrike, një metodë e zakonshme në këto raste kriminale.

Bastisja në Cervera ka çuar në arrestimin e katër personave dhe është çmontuar një plantacion me 277 bimë marijuanë, si dhe janë gjetur 600 vazo bosh. Po ashtu, në Manlleu është arrestuar një anëtar i pestë i grupit dhe janë sekuestruar 567 bimë marijuanë, së bashku me një shumë parash cash.

Operacioni është shtrirë në disa lokacione, përfshirë dy apartamente në komunën e Salou dhe një tjetër në Blanes. Gjatë këtyre bastisjeve, pesë persona të tjerë janë arrestuar dhe janë sekuestruar 75 kilogramë sytha marijuanë të gatshme për shpërndarje, 10,900 euro para të gatshme dhe 25 gramë kokainë.

Vlera totale e drogës së sekuestruar, përfshirë të dy plantacionet, është llogaritur në 482.500 euro në tregun e zi.