Tiranë, 31 mars 2025 – Një 27-vjeçar është arrestuar dhe një 25-vjeçare është proceduar penalisht, pasi kanë kërcënuar një 33-vjeçar që t’u jepte 1000 euro për të fshirë foto dhe shkrime mbi jetën e tij private nga rrjeti social TikTok.

Policia e Tiranës ka finalizuar operacionin e koduar "Imazhi", duke arrestuar shtetasin F. T., 27 vjeç, dhe duke proceduar penalisht shtetasen L. M., 25 vjeçe. Të dy dyshohen se kanë ushtruar presion ndaj viktimës për dhënien e shumës së parave në këmbim të fshirjes së materialeve nga rrjeti social.

Po gjatë këtij operacioni, u ndalua edhe shtetasi L. H., 21 vjeç, për një rast tjetër të ngjashëm të ndodhur më 14 mars 2024. Ai akuzohet për shtrëngim me anë të kanosjes për dhënien e pasurisë, bazuar në një kallëzim të mëparshëm.

Materialet procedurale i janë referuar Prokurorisë së Tiranës për veprime të mëtejshme.