Thiago Motta nuk e ndryshoi stilin e tij as në momentin e lamtumirës nga Juventusi, duke preferuar një deklaratë për ANSA si përmbyllje e eksperiencës bardhezi, pas shkarkimit të tij të djeshëm.

"Kam kaluar momente intensive, të cilat i kam përballuar gjithmonë me maksimumin e përkushtimit dhe vullnetit për t’u përmirësuar çdo ditë", – tha italo-braziliani me stilin e tij të ftohtë dhe dukshëm të distancuar, që e karakterizoi gjatë gjithë aventurës te “Zonja e Vjetër”.

Sikurse është zakon në këto raste ndarjeje, pavarësisht thashethemeve për raporte të tensionuara me drejtuesit dhe lojtarët, Motta ka pasur fjalë diplomatike: "Falënderoj pronarët për mundësinë që më dhanë të bëhem pjesë e këtij klubi të madh, drejtuesit dhe të gjithë personat e klubit që më mbështetën gjatë punës time ditore.

Falënderoj lojtarët për punën dhe angazhimin që treguan nga dita e parë. Iu uroj tifozëve dhe Juventusit më të mirën për të ardhmen", – tha ish-trajneri tashmë i gjigantëve torinezë.