Në një intervistë për “Gazzetta dello Sport”, ish-sulmuesi i Interit dhe Bayern Munich, Jürgen Klinsmann, analizoi sfidën e madhe mes dy klubeve të tij të mëparshme, në çerekfinalet e Ligës së Kampionëve: "Për kë do të bëj tifo? Për futbollin e bukur, kam luajtur me të dyja skuadrat.

Dua të jem atje, dua të vij në ‘San Siro’ për ta mbështetur Interin. Është për të ardhur keq që kjo përballje ndodh kaq herët, në çerekfinale. Do të ishte një finale e mrekullueshme, pikërisht në Mynih. Imagjinoni sa bukur do të ishte".

Për ndikimin e Kompany në stolin bavarez shtoi: "Duke parë nga jashtë, Vincent ka qenë shumë inteligjent në mënyrën se si e ka përqafuar gjithë ambientin e Bayernit. E ka marrë me qetësi dhe është fokusuar vetëm te puna me skuadrën.

Nuk i intereson politika, nuk i interesojnë mediat. Përqendrohet vetëm te skuadra dhe përpiqet të zgjedhë formacionin më të mirë për të marrë rezultate pozitive. Kjo e ka ndihmuar të punojë pa presion të madh".

Si mund ta mposhtë Inzaghi një gjigant si Bayerni? Ish-sulmuesi të të dyja skuadrave sugjeron: "Në një ndeshje të tillë mund të ndodhë gjithçka, një detaj, një penallti, një goditje këndi apo një goditje dënimi mund të bëjnë diferencën. Të dyja skuadrat kanë sisteme të ndryshme loje, por kanë lojtarë që mund ta vendosin ndeshjen në çdo moment".

Një kujtim personal nga Inter-Bayern: "Një sfidë e bukur? Më kujtohet ndeshja e dikurshme, me atë gol të jashtëzakonshëm të Nicola Berti. Tani, sigurisht, Bayerni dëshiron të shkojë deri në fund, sepse finalja do të luhet në shtëpinë e tij, në Mynih.

Kur të jepet mundësia të luash një finale të Champions-it në stadiumin tend do të bësh gjithçka për të arritur atje. Edhe për Interin ka ardhur momenti të fitojë një tjetër trofe europian".