Tiranë, 6 mars 2025– Ministrja e Bujqësisë dhe e Zhvillimit Rural, Anila Denaj, ka njoftuar pas mbledhjes së Këshillit të Ministrave se janë përcaktuar 10 zona kadastrale për kultivimin e kanabisit mjekësor. Denaj tha se këto zona janë përzgjedhur pas studimeve të mirëfillta dhe bazuar në cilësinë e tokës, duke përjashtuar zonat me bujqësi të zhvilluar si Myzeqeja dhe Korça.

“Ky është një proces që vijon nga një ndryshim ligjor i bërë dy vite më parë. Aktualisht janë 10 zona kadastrale të cila janë përcaktuar në bazë të një studimi dhe këto janë të mirëpërcaktuara. Zonat përjashtohen nga ato me intensitet të lartë bujqësor, siç janë Myzeqeja dhe Korça, për të siguruar që prodhimi i kanabisit mjekësor të zhvillohet në zona që kanë kushte të përshtatshme,” tha Denaj.

Në përputhje me zhvillimet, Denaj gjithashtu njoftoi miratimin e skemës së subvencioneve për fermerët dhe blegtorët. Ajo theksoi se kjo skemë përfshin përcaktimin e kriterit bazë dhe masës së financimit për të gjithë sektorët që do mbështeten nga fondet e programit për zhvillimin rural, duke nisur që nga sot.

“Miratuam sot vendimin për fermerët dhe blegtorët, përcaktimin e kriterit bazë dhe masën e financimit për të gjithë sektorët që do mbështeten nga fondet e programit për zhvillimin rural. Ky është një vit i rëndësishëm për bujqësinë shqiptare, dhe skema e subvencioneve nis sot,” përfundoi ministrja.