SHBA – Zjarret shkatërruese kanë përfshirë Pacific Palisades, një zonë luksoze në perëndim të Los Anxhelosit, duke kërcënuar mbi 13 mijë ndërtesa dhe duke detyruar evakuimin e mbi 30 mijë banorëve. Flakët, të përhapura nga erëra të fuqishme që fryjnë me mbi 80 km/h, kanë shkatërruar më shumë se 1200 hektarë tokë, duke shkaktuar kaos dhe frikë në zonën e njohur për banorët e saj të famshëm, si Tom Hanks dhe Dr. Dre.

Presidenti Joe Biden ka ofruar ndihmë federale dhe mbetet në kontakt të vazhdueshëm me autoritetet lokale për menaxhimin e situatës. Pamjet dramatike, përfshirë video të publikuara nga aktori James Woods, tregojnë vilat dhe rrugët e përfshira nga flakët.

Evakuimet po kryhen me vështirësi për shkak të bllokimeve në rrugët dredha-dredha dhe në autostradën e Bregut të Paqësorit, ndërsa shumë banorë e përshkruajnë situatën si një ferr. Për më tepër, mbi 180 mijë konsumatorë janë pa energji elektrike, disa shkolla janë mbyllur, dhe një qendër për të moshuarit është evakuuar në Pasadena, pasi flakët iu afruan një bllok larg.

Përveç zjarrit në Pacific Palisades, një tjetër zjarr është përhapur në Altadena, duke përfshirë 150 hektarë dhe duke nxitur evakuime të tjera. Zyrtarët paralajmërojnë se situata mund të përkeqësohet për shkak të kushteve të pafavorshme të motit dhe thatësisë ekstreme që karakterizon Kaliforninë Jugore.