Gjykata Administrative të Ligurias ka shpallur të paligjshëm kontratën e drejtpërdrejtë mes Komunës së Sanremos dhe Rai-t, (Radio Televizoni italian) për organizimin e Festivalit të Këngës Italiane. Ndërsa edicioni i vitit 2025 do të vazhdojë siç ishte planifikuar, nga viti 2026, organizimi duhet të kalojë nëpër një tender publik. Ky vendim ishte një rrufe në qiell të hapur dhe ka shkaktuar debat politik dhe shqetësim në Rai, ndërsa kundërshtarët e kompanisë, përfshirë Mediaset, po e shohin si një mundësi.

Mekëtë vendim i hiqet ekskluziviteti që RAI ka pasur që nga viti 1955. Sipas vendimit, nuk ka një lidhje të pandashme midis markës dhe formatit televiziv, duke hapur rrugën për konkurrencë publike.

Ky është një goditje e rëndë për RAI-n, që përfiton shikueshmëri dhe të ardhura të mëdha nga reklamat gjatë javës së Festivalit. Vendimi ka nxitur menjëherë një përplasje politike. RAI ka theksuar se mbetet pronare e Festivalit, ndërsa Partia Demokratike ka kërkuar që administratori i saj, Giampaolo Rossi, një aleat i ngushtë i kryeministres Giorgia Meloni, të raportojë në komisionin e mbikëqyrjes për garantimin e rolit publik të Festivalit.

Vendimi ka ardhur si rezultat i një ankese nga presidenti i diskografëve italianë, Sergio Cerruti, i cili me kompaninë e tij, etiketa JE, ka kundërshtuar dhënien ekskluzive të markës "Festivali i Këngës Italiane" për RAI. Gjykata Administrative ka pranuar pjesërisht pretendimin, duke argumentuar se nuk ka një lidhje "të pandashme" mes markës dhe formatit televiziv. Për të mbështetur këtë, vendimi përmend ndryshime të mëdha në edicione të kaluara, si mungesa e publikut në 2021 për shkak të Covid dhe moskoordinimi mes drejtuesit artistik dhe prezantuesit në 2004.

Gjykatësit kundërshtojnë edhe dhënien e drejtpërdrejtë të kontratës për Festivalin në lidhje me ruajtjen e cilësisë, duke argumentuar se një tender publik mund të përmirësonte nivelin teknik e cilësor të festivalit. Ata po ashtu refuzojnë idenë që Festivali ose marka e tij të konsiderohen "trashëgimi kulturore". RAI ka njoftuar se do ta ankimojë në Këshillin Shtetëror dhe mbron idenë e formatit "unik", duke theksuar se Festivali nuk mund të organizohet nga palë të tjera. Ndërkohë, vendimi ka krijuar panik në RAI.

Partia Demokratike kërkon që administratori i RAI-t, Giampaolo Rossi, të raportojë menjëherë në Parlament për të sqaruar si do të sigurohet që Festivali të mbetet një shtyllë e shërbimit publik. Ndërkohë, Sergio Cerruti, nënshkruesi i ankesës kundër RAI-t, kritikon drejtuesit aktualë, duke theksuar se industria muzikore ka mbi 50 milionë euro të papaguara nga 2009 dhe është gati të çojë çështjen në Komisionin Europian për zgjidhje.

Nga kampi i mazhorancës, Fratelli d’Italia siguron mbështetje për RAI-n: "Bashkëpunimi mes televizionit shtetëror dhe Festivalit duhet të vazhdojë," tha senatori i FdI, Gianni Berrino, anëtar i komisionit të mbikëqyrjes në RAI dhe ish-nënkryetar i Sanremos.

Ndërkohë, kompanitë e tjera televizive po e mirëpresin vendimin. Programi i njohur i Mediaset-it, Striscia la notizia, i drejtuar nga Antonio Ricci, shpesh kritik ndaj Festivalit të organizuar nga RAI, e ka komentuar vendimin me ironi: "Nuk kuptohet pse konkursi muzikor duhet të vazhdojë t’i besohet RAI-t." /La repubblica/