Katër urdhër-arreste janë lëshuar sot nga autoritetet në Maqedoninë e Veriut, lidhur me zjarrin vdekjeprurës që shpërtheu mbrëmë në një lokal nate në Shkup, ku humbën jetën 59 të rinj, ndërkohë që rreth 155 kanë mbetur të lënduar me plagë të rënda.

Zjarri shpërtheu në Pulse, në qytetin lindor të Koçanit rreth orës 02:35 të mëngjesit të së dielës, teksa grupi muzikor DNK po performonte.

39 nga viktimat janë identifikuar deri më tani, tha ministri i brendshëm Pançe Toshkovski në një deklaratë për mediat sot. Sipas raportimeve lokale, dyshohet se zjarri shpërtheu si pasojë e fishekzjarrëve që ndezën mbrëmë brenda në lokal. Disa nga të lënduarit janë duke u trajtuar në Spitalin e Përgjithshëm të Koçanit.

Transmetuesi MRT raporton se 27 persona janë duke u trajtuar me djegie të rënda në Spitalin e Qytetit të Shkupit, ndërsa 23 të tjerë në Qendrën Klinike. Zyra e Prokurorit Publik të Maqedonisë së Veriut ka thënë se një ekip prokurorësh janë duke kryer hetime. “Në këtë moment nuk mund të them saktë se si ka nisur zjarri. Jemi duke lëshuar urdhra për të kuptuar përgjegjësinë dhe njerëzit që mund të jenë përfshirë edhe që kanë përgjegjësi. Janë disa persona në Ministrinë e Brendshme që janë duke dhënë deklarata. Nuk mund të themi sa njerëz janë marrë në pyetje”, ka thënë kryeprokurori Ljupço Kocevski.