Tiranë – Katër shtetase, përfshirë një të mitur, janë paraqitur pranë Drejtorisë Vendore të Policisë Tiranë për të kallëzuar raste të rënduara të shpifjeve dhe sulmeve në rrjetet sociale.

Shtetaset B. Sh., 20 vjeçe, E. P., 33 vjeçe, E. R., 52 vjeçe dhe një 15-vjeçare kanë deklaruar se në rrjete të ndryshme sociale janë krijuar profile false në emrat e tyre, të cilat përmbajnë materiale me përmbajtje denigruese dhe fyes ndaj figurës së tyre.

Nga informacionet paraprake, profilet janë përdorur për të publikuar postime të pavërteta dhe ofenduese, duke cënuar dinjitetin dhe jetën private të këtyre shtetaseve.

Policia tha se ka nisur procedurat hetimore për identifikimin e autorëve që fshihen pas këtyre profileve.

Rastet po trajtohen nga strukturat e specializuara për Krimet Kibernetike dhe pritet që përmes gjurmimit të IP-ve dhe bashkëpunimit me platformat përkatëse, të bëhet i mundur zbardhja e plotë e ngjarjes.

DVP Tiranë thotë se nxit qytetarët të raportojnë çdo rast të ngjashëm të dhunës kibernetike dhe garanton ndjekje ligjore për autorët e përfshirë në përhapje shpifjesh dhe përmbajtjes ofenduese në internet.