Një lajm tronditës nga Anglia mund të hedhë edhe më shumë “benzinë zjarrit” në sezonet tashmë zhgënjyese të Manchester City dhe Manchester United. "The Telegraph" pretendon se është në posedim të disa fotografive që tregojnë se në akademitë e dy klubeve janë aktivë 6 lojtarë që kanë deklaruar moshë më të re nga ajo e vërteta.

Gazeta britanike nuk përmend emra specifikë të lojtarëve të përfshirë në këtë skandal të mundshëm, por raporton se ata tashmë janë të gjithë madhorë, ndonëse zyrtarisht figurojnë ende nën moshën 18 vjeç. Madje, disa prej tyre kanë fituar edhe trofe me kombëtaret e moshave.

Aktualisht, të dyja klubet e Manchester-it, Premier League dhe Ministria e Brendshme Britanike kanë refuzuar të komentojnë mbi këtë çështje, duke deklaruar se çdo veprim ka qenë në përputhje me rregulloret, përfshirë kontratat dhe regjistrimin e lojtarëve të përmendur.

Megjithatë, "The Telegraph" shton se asnjë nga lojtarët e përfshirë nuk i është nënshtruar ndonjë testi shkencor për të përcaktuar moshën e tyre reale, diçka që ligji “Nationality and Borders Act 2022” e lejon për ata që kalojnë kontrolle të imigracionit kur hyjnë në Mbretërinë e Bashkuar.

Për më tepër, gazeta thekson se çdo skandal për manipulimin e moshës së futbollistëve të rinj në Angli mund të ngrejë dyshime edhe për trafikimin e fëmijëve në Mbretërinë e Bashkuar, duke shtuar një dimension tjetër të rëndë në këtë çështje.