Shkodër- Pas motiti të keq, që përfshiu qarkun e Shkodrës, akset e Lotit 1, Hani i Hotit-Tamarë, Tamarë-Vermosh dhe Bogë-Theth rrugët janë pastruar nga reshjet e dëborës dhe janë kriposur për të lejuar qarkullimin normal të mjeteve.

Moti i keq gjatë tre ditëve të fundit shkaktoi problematika, kryesisht nga rënia e reshjeve të dëborës në zonat malore.

Më i prekuri ishte qarku i Shkodrës dhe rruga Qafë-Thore-Theth. Zona e Thethit pati problematikë të bllokimit për shkak të rrëzimit të ortekëve, ndërsa tashmë është hapur.

Në Qafë-Thore, me rënien e temperaturave dhe krijimin e sigurisë për ndërhyrje, u aktivizuan të gjitha forcat dhe u hap pjesa e bllokuar nga orteqet.

Gjatë ditës së djeshme dhe natën, borëpastrueset punuan në terren për të mos lejuar bllokimin e këtij aksi.

Edhe Autoriteti Rrugor Shqiptar konfirmoi se ka pasur problematika në këtë segment dhe se aksi Qafë-Thore dhe rruga e Thethit janë hapur.