Brenda 30 dhjetorit të këtij viti qeveria shqiptare do t’u kthejë profesionistëve të lirë taksën e paguar prej 15% dhe do të fshijë detyrimet e dala në sistem për gjithë të tjerët.

Ministri i Ekonomisë fhr Financave Petrit Malaj doli sot në media pas mbledhjes së qeverisë dhe foli për vendimin e marrë.

Ai tha se janë 6.450 tatimpagues të cilët do të rimbursohen me një fond total prej 501 milionë lekësh.

Ky proces rimbursimi do të përfundojë brenda këtij viti ashtu si dhe fshirja e detyrimeve të dala në sistem

“Në mbledhje u miratua akti normative për kthimin e këstit të tatim fitimit të parapaguar nga profesionistët e lirë.

Qeveria ka patur vullnetin për të kthyer fondet te profesionistët e lirë. Qeveria përmes këtij akti normative bëri të mundur kthimin e fondeve te profesionistët e lirë dhe ndonjë detyrim eventual të regjistruar gjatë kohës që ligji ishte në fuqi u shua.

Nga ky akt përfitojnë 6450 tatim pagues që do  rimbursohen me një fond total 501 mln lekësh. Parashikojmë që procesi i rimbursimit të përfundojë brenda 31 dhjetorit 2024”, bëri me dije ministri Malaj.

Gjykata Kushtetuese vendosi më 27 Qershor 2024 rrëzimin e nenit 69 që diskriminonte profesionistët e lirë nga tatimi prej 15%.

AKT NORMATIV

PËR

NJË SHTESË NË LIGJIN NR.29/2023 “PËR TATIMINMBI TË ARDHURAT”, TË NDRYSHUAR

Në mbështetje të nenit 101 të Kushtetutës, me propozimin e ministrit të Financave, Këshilli i Ministrave

V E N D O S I:

Neni 1

Pas pikёs 5, tё nenit  69, “Dispozita kalimtare”, tё ligjit nr.29/2023, “Pёr tatimin mbi tё ardhurat”, tё ndryshuar, shtohet pika 6, me këtë përmbajtje:

“6. Parapagimet/këstet e paguara apo të gjeneruara në zbatim të nenit 63, të këtij ligji, nga të vetëpunësuarit, si dhe entitetet me të ardhura bruto deri në 14 milionë lekë në vit, të cilat furnizojnë shërbime profesionale sipas përcaktimeve të pikёs 1, të nenit 4, dhe tabelës analitike nr.2, të                    vendimit nr.753, datë 20.12.2023, tё Kёshillit tё Ministrave, “Për dispozitat zbatuese të ligjit nr.29/2023 “Për tatimin mbi të ardhurat”, të shfuqizuar me vendimin nr.52, datё 27.6.2024, tё Gjykatёs Kushtetuese tё Republikёs sё Shqipёrisё, u rimbursohen tatimpaguesve apo u fshihen nga administrata tatimore, brenda datës 30 dhjetor 2024.

Shuma e kësteve të paguara do të pasqyrohet te klasa përkatëse e të ardhurave dhe, nëpëmjet degës së thesarit, administrata tatimore kryen rimbursimin në llogarinë bankare të tatimpaguesit.

Drejtori i Përgjthshëm i Tatimeve, me akt të brendshëm, miraton rregullat procedurale për zbatimin e kësaj pike.”.

Neni 2 Ky akt normativ hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

Në mungesë dhe me porosi ZËVENDËSKRYEMINISTRI

BELINDA BALLUKU