Magazinë
Transmetuar më 15-11-2024, 10:05

FIFA ka zbuluar trofeun zyrtar të Kupës së Botës për Klube 2025. I krijuar në bashkëpunim me markën botërore të bizhuterive luksoze “Tiffany & Co”, ky trofe do t’iu jepet për herë të parë fituesve të kompeticionit të ri, i cili do të zhvillohet në SHBA nga e diela e 15 qershorit deri të dielën e 13 korrikut 2025. Finalja do të zhvillohet në stadiumin “MetLife” të New York-ut, aty ku do të dorëzohet edhe trofeu i artë.

"Inovative, gjithëpërfshirëse, revolucionare dhe vërtet globale, Kupa e re e Botës për Klube me 32 ekipe meriton një trofe që i përfaqëson të gjitha këto, – tha presidenti i FIFA-s, Gianni Infantino. – Është sa prestigjioz dhe i përjetshëm. Një trofe i artë, simbol i së ardhmes dhe i frymëzuar nga e kaluara. Skuadra që do të ngrejë këtë trofe do të ketë në duart e saj botën e futbollit të klubeve, do të bëjë historinë. Mezi po pres fillimin e një epoke të re për futbollin”.

"Me përbërje ari 24 karatësh, trofeu i Kupës së re të Botës për Klube përmban mbishkrime të ndërlikuara të gdhendura me lazer në të dyja anët, të shfaqura me tekst dhe imazhe, teksa portretizojnë historinë e pasur të futbollit.

Mbishkrimet përfshijnë një hartë bote dhe emrat e të gjithave, 211 federatave të lidhura me FIFA-n, si dhe të 6 konfederatave, që përfaqësojnë diversitetin gjeografik e kulturor të sportit, – shkruhet në përshkrimin e trofeut, në faqen e internetit të FIFA-s.

– Disku qendror i trofeut tregon një seri ikonash, që mbartin traditat e futbollit, duke përfshirë një hartë botërore. Hapësira është në dispozicion për gdhendjen me lazer të emblemave të klubeve fituese për 24 edicione të kompeticionit.

Rekordet e famshme ‘Voyager Golden Records’, të mbajtura nga misionet hapësinore të NASA-s në vitet 1970, tabela periodike, hartat e udhëtimeve ‘pioniere’ dhe astronomia luajtën një rol në konceptimin e trofeut.

Duke festuar të kaluarën dhe të ardhmen e sportit, trofeu përmban simbole qiellore që përfaqësojnë pozicionet e përafërta të planetëve në kohën e themelimit të FIFA-s, të shtunën e 21 majit 1904 në Paris, si dhe ndeshjen hapëse të kompeticionit më 15 qershor 2025 në Miami, SHBA”.

Një mesazh për kampionët është gdhendur në trofe, duke përfshirë sa vijon: "Atyre që e mbajnë këtë trofe, historia ju përket! Ju jeni dëshmitar i një momenti në kohë, që përfaqëson majën e futbollit të klubeve, të dhuruar nga pak njerëz, por të festuar nga shumë të tillë".

Këto fjalë pasqyrojnë statusin e trofeut si një simbol i madhështisë, duke nderuar legjendat e së kaluarës, ndërsa frymëzon klubet në mbarë botën.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Bashkohu me kanalin e NOA WhatsApp për lajmet më të fundit direkt në celularin tënd

Lajmet e fundit