Gjysmë i kënaqur. Stefano Pioli është i lumtur që ka kaluar në 1/8 finale të “Europa League”, por njëkohësisht është edhe i zhgënjyer që ka pësuar tre gola të tjerë dhe ka humbur ndeshjen. Milani kishte fituar 3-0 në ndeshjen e parë, në “San Siro”, por humbi 3-2 në kthim, ndaj Rennes.

Trajneri kuqezi ka disa keqardhje: "Ne do të marrim me vete kënaqësinë që kaluam raundin në një ndeshje shumë të vështirë, por mund t’i kishim shfrytëzuar më mirë hapësirat dhe kundërsulmet. Nuk ishte e lehtë, por ne u kualifikuam në raundin tjetër dhe kjo ka rëndësi”.

Për atë që e pret tashmë në 1/8 finale të “Europa League”: "Tani janë të gjithë të fortë, do të jenë ndeshje të vështira. Nëse doni të shkoni deri në fund, kushdo që t’ju bjerë në short do të jetë i vështirë. Sidoqoftë, kushdo që do të përballet me ne, nuk do të jetë i lumtur.

Leao? Jam shumë i lumtur. Qartësisht për mua është një lojtar vendimtar, është i rëndësishëm edhe kur nuk shënon. Të dilte nga ndeshja pa gol do të ishte mëkat. Jam shumë i kënaqur me qëndrimin e tij, duhet të vazhdojë të punojë dhe të besojë te vetja.

Sërish probleme në mbrojtje? Nuk donim të pësonim tre gola, duhet të jemi më të kujdesshëm, sepse e ndërlikojmë jetën tonë. Rennes, sigurisht që aplikoi të gjithë potencialin e vet sulmues. Ka situata në të cilat organizimi dhe komunikimi mes shokëve të skuadrës mund të përmirësohet, por edhe situatat individuale. Shpresojmë të jemi në gjendje të rritemi dhe të përmirësohemi së shpejti.

Skuadra krijoi shumë në sulm, kjo ndeshje konfirmoi potencialin e rëndësishëm që kemi. Nëse kundërshtarët lënë hapësira, ne bëhemi të rrezikshëm. Megjithatë, duhet të gjejmë më shumë soliditet dhe përqendrim për t’iu lejuar më pak mundësi kundërshtarëve tanë.

Nuk mund ta mbyllim kështu, duhet të jemi një ekip. I yni është një grup lojtarësh të rëndësishëm. Ndeshja kundër Monza shkoi keq, mund të kishim bërë më mirë. Tani duhet të mendojmë për ndeshjen kundër Atalantës".