Bashkëpunimi Shqipëri–Mbretëri e Bashkuar: Një model suksesi në luftën kundër trafikimit dhe kontrabandimit të emigrantëve

Londër – Në Londër u zhvillua Samiti i Sigurisë Kufitare, ku Shqipëria u përfaqësua nga Drejtori i Departamentit të Policisë Kriminale, Drejtues i Lartë Neritan Nallbati, dhe Drejtori i Departamentit për Kufirin dhe Migracionin, Drejtues i Lartë Saimir Boshnjaku.

Gjatë punimeve të samitit, u diskutuan mënyrat më efikase për të parandaluar dhe luftuar trafikimin e qenieve njerëzore dhe kontrabandimin e emigrantëve, përmes bashkëpunimit ndërkombëtar dhe shkëmbimit të praktikave më të mira.

Nallbati ndau eksperiencën e suksesshme të bashkëpunimit mes Policisë së Shtetit dhe homologëve britanikë, duke theksuar rezultatet konkrete që janë arritur përmes koordinimit operacional dhe shkëmbimit të informacionit.

Drejtori i Përgjithshëm i NCA-së, Graemme Biggarm, në fjalën e tij vlerësoi lartë Policinë shqiptare:

“Bashkëpunimi i shkëlqyer operacional mes Mbretërisë së Bashkuar dhe Policisë shqiptare është shembull për të gjithë partnerët në luftën kundër trafikimit të qenieve njerëzore, kontrabandimit të emigrantëve dhe krimit të organizuar.”

Gjatë samitit, Nallbati zhvilloi një takim miqësor me Drejtorin e NCA-së, ku u rikonfirmua mbështetja e vazhdueshme për Policinë shqiptare.

Ndërkohë, Boshnjaku pati një takim konstruktiv me Drejtorin për Migracionin në Mbretërinë e Bashkuar, Bas Javit, i cili falënderoi Policinë shqiptare për profesionalizmin dhe përkushtimin në luftën kundër kontrabandimit të emigrantëve. /noa.al