Transmetuar më 06-02-2024, 06:19

Duke nisur nga dita e sotme 6 shkurt dhe për 8 ditë rresht, do të ketë devijim të lëvizjes së automjeteve.

Ky devijim vjen për shkak të punimeve që po kryhen në projektin e linjës hekurudhore Durrës-Tiranë-Terminali Publik i Transportit dhe i linjës së re hekurudhore për në aeroportin ndërkombëtar të Rinasit.

Autoriteti Rrugor Shqiptar (ARRSH) njoftoi se trafiku rrugor do të devijohet në rrugën e vjetër të Durrësit, pranë nënstacionit të vjetër Rrashbull, duke filluar nga dita e nesërme (6 shkurt).

"Në vijim të punimeve që po kryhen në projektin “Rikonstruksioni i linjës hekurudhore Durrës-Tiranë Terminali Publik i Transportit (TPT) dhe i linjës së re hekurudhore për në aeroportin ndërkombëtar të Rinasit (ANR)”, do të bëhet devijimi i Trafikut Rrugor në rrugën e vjetër të Durrësit, pranë nënstacionit të vjetër Rrashbull.

Për të mos bllokuar qarkullimin e mjeteve, teksa do të punohet në korsinë e majtë do të lihet korsia e djathtë e lirë dhe anasjelltas.

Punimet do të zgjasin 8 ditë, fillojnë ditën e martë, datë 06.02.2024-14.02.2024, dhe do të shoqërohen me sinjalistikën përkatëse sipas Planit të Menaxhimit të Trafikut.

Kompania zbatuese në bashkëpunim me ARRSH dhe Policinë Rrugore kanë marrë masat për menaxhimin e trafikut.

Kërkojmë mirëkuptimin e drejtuesve të mjeteve dhe banorëve të zonës për këtë ndërhyrje", thotë ARRSH.

Bashkohu me kanalin e NOA WhatsApp për lajmet më të fundit direkt në celularin tënd