Transmetuar më 23-11-2018, 14:07
Gashi Nuka, Ina Nuka

Gashi Nuka, babai i efektives së policisë, Ina Nuka, që humbi gishtat e dorës nga protesta e dhunshme dje para Kuvendit shprehet se gjendja e vajzës për momentin është e mirë, ndërsa pritet që të transportohet për në Turqi për mjekim të specializuar.

Ai thotë së mjekët i kanë dhënë shpresë për gishtat pas ndërhyrjes në Turqi, ndërsa duke folur për ‘Report Tv’ dhunën e cilëson si të patolerueshme.

25-vjeçarja u plagos dje në protestën para Kuvendit, ku banorët e “Astirit” u përplasën dhunshëm me policinë. Nga përplasja u lënduan15 policisë dhe 3 qytetarë, ndërsa 25 persona u shoqëruan.

Si është gjendja e vajzës suaj?

Gjendja po përmirësohet për momentin. Ka dhimbje, por është më mirë. Problemi është te gishtat, i janë këputur dy gishta

Çfarë iu kanë thënë mjekët?

Na kanë dhënë një fare shprese, por jashtë vendit në Turqi.

Kur do të niset?

Nga momenti në moment, sapo të jetë gati.

Çfarë iu tha Kryeministri?

Komunikoi bashkëshortja, tha që do të bëjmë çfarë është e mundur për vajzën që të rregullojmë gishtat sikur i pati. Jemi me shpresë.

Si e gjykoni atë që ndodhi dje?

Dhuna është e patolerueshme. Mesazhi im është që të mos ndodhë më ajo ndodhi, pasi dje ishte vajza ime, nesër mund të jetë një tjetër. Kushdo ka të drejtë për protestë 24 orë non stop, por pa dhunë.

Kush mendoni se është përgjegjës?

Nuk kam çfarë të them, nuk bëj njeri përgjegjës, pasi nuk kam parë gjë si ndodhi ngjarja.