Çfarë ndodh kur njerëzit u drejtohen chatbots dhe kukullave mekanike për të kënaqur dëshirën erotike

Nga fundi i këtij muaji, gjermanët do të mund të rezervojnë takime njëorëshe me kukulla seksi me inteligjencë artificiale, pasi bordelloja e parë kibernetike hapet zyrtarisht pas një periudhe prove.

Klientët do të jenë në gjendje të bisedojnë me robotët dhe të përfshihen në kontakt fizik me ta.

"Shumë njerëz ndjehen më rehat kur ndajnë çështjet personale me një makineri, sepse ajo nuk i gjykon ata," tha për BBC Philip Fussenegger, themeluesi dhe pronari i Cybrothel, citon noa.al.

“Deri më tani ka pasur një interes të konsiderueshëm për kukullat e aktrimit me zë, ku përdoruesit mund të dëgjojnë vetëm zërin dhe të ndërveprojnë me kukullën. Tani, ka edhe më shumë interes për ndërveprimet me inteligjencën artificiale”, tha ai.

Privatësia

Bots-et e Cybrothel janë një nga mënyrat e shumta me të cilat AI po përdoret në industrinë e seksit.

Firma e matjeve SplitMetrics raportoi se aplikacionet shoqëruese të AI arritën 225 milionë shkarkime në Google Play Store.

"Unë besoj se më shumë kompani softuerësh do të marrin parasysh këtë prirje dhe do të konsiderojnë mënyra të reja të inovacionit dhe përfitimit," komentoi menaxheri i përgjithshëm i kompanisë, Thomas Criberneg.

Aplikacionet shoqëruese të AI janë me të vërtetë fitimprurëse, ra dakord Misha Rickoff, studiuese e privatësisë për udhëzuesin e Fondacionit Mozilla për Privacy Not Included.

"Duke pasur parasysh që shumica e chatbot-eve kanë tarifa dhe teknologjia bazë është zhvilluar diku tjetër [nga kompani si OpenAI], duket sikur marzhi i fitimit është i madh."

“Për më tepër, këto aplikacione mbledhin të dhëna personale dhe shpesh i ndajnë ato me palë të treta si reklamuesit – një model biznesi i provuar”, tha studiuesi.

Por përparimi i inteligjencës artificiale në industrinë e seksit ngre shqetësime.

Paragjykimet

Një problem janë paragjykimet dhe stereotipet e natyrshme në shumicën e modeleve gjeneruese të AI, të cilat gjenerojnë përmbajtje të re bazuar në të dhënat me të cilat janë trajnuar.

Ekziston rreziku që stereotipet rreth identitetit gjinor, seksit dhe kënaqësisë të riprodhohen nga chatbot-et e seksit, paralajmëroi Dr Kerry McInerney nga Universiteti i Kembrixhit.

“Është kritike të dimë se çfarë lloj të dhënash përdoren për të trajnuar chatbot për seks, ose rrezikojmë të riprodhojmë ide rreth seksit që zhvlerësojnë kënaqësinë femërore dhe injorojnë seksin jashtë marrëdhënieve heteroseksuale”.

Ekziston edhe rreziku i varësisë, shton Rickoff, i cili thekson se chatbot-et e dashurisë u drejtohen njerëzve të vetmuar, kryesisht meshkujve.

"Shumica e chatbot-eve që kemi shqyrtuar kanë një potencial të lartë për varësi dhe pasoja potencialisht të dëmshme, veçanërisht për përdoruesit me probleme të shëndetit mendor," tha studiuesi.

Fondacioni Mozilla, shtoi ai, ka shtuar flamuj paralajmërues në disa chatbot të AI "pasi kemi identifikuar modele të abuzimit, dhunës dhe marrëdhënieve me të miturit".

Rickoff ngriti gjithashtu çështjen e privatësisë, me chatbot-et e takimeve që mbledhin "sasi të paprecedentë të të dhënave personale".

Siç theksoi ai, 90% e aplikacioneve të ekzaminuara nga Moxilla "mund të ndajnë ose shesin të dhëna", ndërsa më shumë se gjysma e aplikacioneve nuk lejojnë fshirjen e të dhënave personale.

Pasojat

Të tjerë paralajmërojnë për pasojat në marrëdhëniet e vërteta ndërpersonale.

“Vështirësitë mund të lindin nëse takimet në botën reale rezultojnë të jenë zhgënjyese, sepse ato nuk përputhen me kërkesat specifike që u ofron përdoruesve pornografia AI”, tha Tamara Hoyton nga konsulenca Relate.

Ajo gjithashtu paralajmëroi se AI mund t’i joshë përdoruesit në praktika të rrezikshme, pasi mund t’u japë atyre përshtypjen se mund të kenë gjithçka që duan.

Nga ana e tyre, kompanitë që përdorin AI në industrinë e argëtimit për të rritur shitjet, pranojnë nevojën për kujdes, por këmbëngulin se teknologjia e re ka një rol të rëndësishëm për të luajtur.

Philip Hamberger, kreu i AI në Lovehoney, thotë se kompania e tij synon "të përmirësojë përvojën seksuale të klientëve të saj, në vend që ta zëvendësojë atë, që është një vijë e kuqe kryesore".

Të tjerë shkojnë më tej dhe parashikojnë se AI do të sjellë përfitime. Kështu beson Ruben Cruz, bashkëthemeluesi i kompanisë spanjolle The Clueless Agency, e cila krijoi një nga ndikuesit e parë dixhitalë, Aitana Lopez.

Inteligjenca artificiale mund ta çlirojë industrinë nga shqetësimet etike që lidhen me punësimin e njerëzve të vërtetë, tha ai.

“Ky tranzicion synon të sigurojë që asnjë qenie njerëzore, mashkull apo femër, të mos ketë nevojë të seksualizohet në të ardhmen”. /noa.al