Ish-ministri i Brendshëm Saimir Tahiri tregoi të vërtetën e tij lidhur me akuzat për trafik droge, pas shkatërrimit të një bande shqiptaro-italiane që merrej me trafik droge, ku mes tyre u arrestuan dy persona për të cilët thuhet se janë kushërinj të tij.

Në një konferencë të posaçme për mediat pasditen e kësaj të marte, Tahiri tha se e kupton shumë mirë se sot, ndoshta më shumë se kurrë, cilido që e njeh personalisht ose jo, përfshirë familjen e tij, miqtë e këdo që e ka takuar , është i shtangur nga lajmet që bëhen publike, e sidomos nga përfshirja e emrit të tij.

Ai tha se i kupton mediat, gazetarët e portalet, që herë me pyetje e herë me akuza, me dashje apo keqdashje, “kjo ka fare pak rëndësi për mua, presin përgjigje prej meje”.

Tahiri deklaroi se mbi të gjitha falënderon të gjithë ata që i kanë shkruar e kontaktuar në çdo formë, ata që kanë punuar e punojnë ende bashkë me të, ata që kanë besuar e besojnë ende tek ai.

“Siç kuptoj edhe kundështarët e mi, në opozitë e jo vetëm, të cilën për herë të parë e të fundit sot, as do i akuzoj e as do i kundëshrtoj, pikërisht pse sot është dita e tyre të shfrytëzojnë pallavrat e dy kriminelëve që i shesin mend njëri-tjetrit e të tjerëve se kush ka më shumë njohje, influencë apo mbështetje në një veprimtari kriminale që në çdo ditë të punës time e kam luftuar e do vazhdoj ta bëj, duke kërkuar gjithmonë të vërtetën, pavarësisht çmimit të saj”, u shpreh Tahiri.

Ai shtoi se është rritur nga prindërit e tij, e sot por rrit të birin, duke besuar tek e vërteta, i bindur se sado e madhe qoftë gënjeshtra dhe abuzimi, e vërteta dhe e drejta, janë aty.

“Dhe sikur gënjeshtrën dhe abuzimin ta besojnë kollaj mijëra e miliona vetë, e vërteta vlen më shumë, edhe sikur i pari e i fundit që e ka mësuar jam unë vetë”, tha ai.

Tahiri shtoi se ka mbajtur detyrën e ministrit të Brendshëm për më gjatë se kushdo tjetër para tij, duke mos u dorëzuar kurrë përballë sulmeve të pafund, nga kundështarë që i kishte përballë apo në krah.

Ai tha se ka luftuar çdo ditë, me çdo fuqi, për të bërë detyrën me drejtësi, si detyrimin më të shenjtë përballë të birit më së pari, famlijes, përballë miqve e cilitdo që e njeh, por mbi të gjitha përballë qytetarëve që e kanë besuar dhe zgjedhur, “e që nga sot pres me padurim të dalë e vërteta në dritën e diellit, si e vetmja rrugë për të pasur besim më të fortë te njëri-tjetri e tek Shqipëria e tim biri dhe e fëmijëve nesër”.

Ish-ministri deklaroi se është përpjekur të punoj me çdo punonjës policie duke besuar te forca e pashtershme e ca burrave e grave, djemve dhe vajzave, që deri para se të merrte detyrën, ishin sipas tij, viktimat më të para e të pafajshme të botës së krimit e të politikës së ndyrë, që në një mënyrë apo tjetër, i kishte tradhtuar pa rreshtur.

“Përballë deputetit, kam mbrojtur policin. Përballë politikanit, ministrit, pushtetarit, pronarit të medias, gazetës a portalit, unë kam mbrojtur policin, përballë cilitdo të forti për nga muskujt apo detyra, kam mbrojtur gjiithmonë e pa asnjë hezitim policin”, deklaroi Tahiri.

Duke besuar se ndonëse detyra i diktonte të ishte larg, ai tha se e vërteta dhe bindja e përditshme ia bënte detyrimin akoma më të madh të ishte në krah të policëve që bënin ndershmërisht detyrën e që nuk duhet të ishin më të braktisur e tradhtuar, por me forcën e ligjit e pa kursyer as forcë nga forca e tij për të zbatuar ligjin e për të bërë drejtësi ndaj kujtdo.

Ai tha në vijim se ka punuar çdo ditë për ta modernizuar, për t’i dhënë mundësi, pagë, veshje e mjete që cilido që shërbente në polici, të ndjente dinjitetin e të qenit një shërbëtor i shtetit dhe qytetarëve, e jo një personazh komik në rrugët e qytetit.

“Kam besuar se puna jonë e madhe, pashmangshmërisht do na përplaste me vështirësi të pafund. Se rrugës do bënim gabime, siç kam bërë unë, pikërisht pse kam besuar se kush punon mund të gabojë, por mbi gabimet e veta e vështirësitë, ka gjithmonë forcë e shpresë për tu ringritur siç ringrihet çdo ditë ai që nuk ka bukë në tavolinë e rrogë në fund të muajit. Kam qenë i vetëdijshëm se t’i shërbesh qytetarëve e jo oligarkëve, të mbrosh policin e jo pushtetarin a të fortin, ka plot kosto”, tha ndër të tjera.

Ai shtoi se për shkak të punës humbet miqtë, humbet edhe aleancat e pushtetit në korridoret e politikës si dhe humbet mundësinë që të ngresh telefonin e të rregullosh lajmet nëpër redaksi.

“Këto i kam humbur me vetëdije, siç kam humbur edhe mundësinë për kompromise me njerëz të pushtetshme që i kisha nuk doja t’i kisha kurrë në krah por vetëm përballë, pavarësisht fuqisë së tyre politike për të më mbështetur mua në cilindo momentapo për të më bërë dëm në momentin e duhur”, tha Saimir Tahiri.

Sepse siç deklaroi ai, që ditën kur ka filluar të merret me këtë detyrë, më shumë sesa ekuilibri i pushtetit, për të kishte rëndësi drejtësia, qoftë edhe për një mesazh të një qytetari

Tahiri deklaroi se është ende sot i bindur se detyra që kishte nuk ishte si çdo detyrë, por ishte detyra e jetës për të bërë drejtësinë dhe shtetin që kam ëndërruar unë e ëndërron sot çdo shqiptar.

Ai tha se bashkë me të gjithë skuadrën që drejtonte, u arrit jo pak, si në luftën kundër krimit, ashtu dhe në dinjitetin që i’u dha çdo punonjësi policie.

Në këtë linjë nënvizoi se sigurisht pati vështirësi, të pamerituara ose jo por kjo vetëm sepse lufta me krimin dhe paligjshmërinë, nuk ishte vetëm me ata që kishte përballë, por edhe me këdo tjetër që në dekadat e fundit “ishte stërvitur të mbijetonte në llumin e politikës e të rrugës”.

Ai deklaroi se kjo luftë e gjithçka u arrit, kishte jo pak kosto për të, por edhe kënaqësinë e pamasë nga mirënjohja e kujtdo që prej punës së tij dhe ekipit që drejtonte, ka marrë një ndihmë sado të vogël, që më parë as e merrte e as e ëndërronte ta merrte.

“Sot është një ditë jo e lehtë edhe për mua, në raport me veten dhe moralin tim, familjen time dhe mbi të gjitha tim bir. Po kështu në raport edhe me njerëzit që më njohin, me kolegët në parlament e politikë, me njerëzit që më kanë besuar e zgjedhur e që besojnë ende tek unë. Dy kriminelë, që janë kushërinjtë e mij të shkallës së 10, janë arrestuar për trafik droge, e siç u bë publike, pa hezituar të përmendin edhe emrin tim ndonjëherë”, tha ai.

Ish-ministri i cilësoi si kriminelë që përdorin emra politikanësh a ministrash për t’u mburrur me njëri tjetrin e për dobi të përfitimeve të tyre të paligjshme, që siç tha ai, ka pa pafund, e se ai nuk është as i pari e as i fundit.

Tahiri deklaroi se nuk do donte kurrë të ishte në këtë pozitë, por kërkoi nga prokuroria, personalisht, me vullnet të lirë e pa përfituar nga asnjë lloj imuniteti parlamentar a politik, të hetohet e verifikohet gjithçka lidhur me të e jo vetëm, me detyrën tij e jo vetëm, me famlijen e tij e jo vetëm.

“Dhe pavarësisht se ky është vendi ku politikanë e deputetë e pushtetarë ndajnë gratë për të fshehur pasurinë, vendi ku mohohet vëllai, motra, kunati e baxhanaku, për t’ju fshehur të vërtetës unë nuk jam ajo rracë njeriu e as politikani, por ndjej përgjegjësi morale për veprimet e kujtdo, qoftë edhe të ca kushërinjve të mi të 10, të cilëve kam bërë gabimin e madh e të vetëm që gati 4 vite më parë u kam shitur makinën time personale”, u shpreh Tahiri.

Ai nënvizoi se nuk duhet të kishte neglizhuar të verifikonte kujt po ia shiste makinën, e pavarësisht se në vendin tonë të rrallë janë ata që bëjnë këto verifikime, e të shumtë ata që më kollaj i fshehin a i xcojnë në emra të tjerë pasuritë e tyre, deklaroi se përsëri mban përgjegjësi morale për këtë veprim.

Përtej kësaj, tha Tahiri, nuk ka pasur e as ka asnjë raport të çfarëdollojshëm, e aq më pak ndonjë raport të paligjshëm, ndaj deklaroi se nuk ka asnjë përgjegjësi më shumë për çdo aktivitet kriminal të kujtdo, “qofshin edhe këta kushërinjtë e mij të 10, që as kanë hezituar të përdorin emrin tim, e që shpresoj drejtësia ti hetojë e dënojë siç i takon atyre e kujtdo tjetër në bazë të ligjit”.

Ish-ministri tha se nuk kërkon nga askush që ta besojë e aq më pak që ta mbrojë publikisht, më së pari nga kolegët e partisë së tij, në parlament ose jo, “Në qeveri padyshim, përfshirë kryeministrin”.

“Siç nuk kërkoj nga askush që më njeh të më besojë kot, për më tepër që politikanë që betohen e përbetohen ky vend ka parë boll, deklaroi Tahiri, “edhe kur janë kapur me presh në dorë, me filmime e regjistrime, duke vjedhur e duke vrarë”.

Saimir Tahiri tha se “Unë as jam kjo rracë, e as do jem kurrë lloji i politikanit që fshihet pas pushtetit, pas miqësisë me pronarët e medias apo në koridoret e pushtetit”.

Ai deklaroi prerë se nuk ka ndërmend ti shtrij dorën ndokujt për ndonjë hije a skup për rrugën e së vërtetës.

Tahiri tha se do presë deri në fund të çdo verifikimi a çdo hetimi, e as do rri duarkryq por do luftoj vetë që çdo e vërtetë të zbardhet deri në fund, e drejtësia të thotë fjalës e saj.

Deri atëherë, tha se për këtë shqetësim e rrëmujë i kërkon ndjesë të birit, famlijes e prindërve të tij, kolegëve e cilitdo shqiptari që qoftë edhe një herë të vetme ka besuar tek ai.

“Unë do shoh në sy këdo prej jush i bindur se besimin që më keni dhënë është borxhi më i madh që i kam secilit, për ta çuar të vërtetën deri në fund. Jo me fjalët e mia, që sot nuk mjaftojnë kurrësesi, por me çdo hapësirë të drejtësisë për të gërmuar çdo të vërtetë”, tha në mbyllje ish-ministri i Brendshëm. /a.y/noa.al

TAHIRI: KUSHËRI S’KAM VETËM HABILAJN, POR EDHE NJË KRIMINEL TJETËR

SAIMIR TAHIRI: KUNDËRSHTARË NUK KISHA VETËM NË PD POR EDHE NË PS

Akuzat për trafik droge, Saimir Tahiri në konferencë: Ja e vërteta!

PROKURORI I PËRGJITHSHËM REFUZON TË PRESË NË TAKIM SAIMIR TAHIRIN

“Tahiri i lidhur me trafikantët e drogës”, Basha thirrje të fortë për kryeprokurorin Llalla

Emri i Tahirit u përmend nga trafikantët e drogës, Rama bën deklaratën e papritur

Berisha: Përgjimet italiane, gati mandati për arrestimin e Saimir Tahirit

Akuzat pas arrestimit të Habilajt, Tahiri konferencë në orën 16:00

Deputeti demokrat publikon dy akuza: Mjaftojnë për të futur Tahirin në burg

Media italiane zbardh përgjimet e Habilajt: 30 mijë euro duhet t’ia jap Saimirit