Zbulohen të tjera detaje, lidhur me atentatin mafioz të shënuar mbrëmjen e së hënës që lamë pas, ku në afërsi të zonës së Pediatrisë në Tiranë, u ekzekutua me armë zjarri Devi (Dëfrim) Kasmi, 42 vjeç,

Policia e Tiranës, dy ditë më parë komunikoi arrestimet e para dhe foli për një grup të organizuar kriminal, dhe vrasës me pagesë.

Si “këmbëza” që shkrepi armën ndaj Kasmit u arrestua ish-efektivi i forcave speciale të policisë greke, Efthymiou Efthymious, 41 vjeç.

Por gjatë marrjes në pyetje nga policia ai mohon të ketë gisht në atentatin e 29 janarit, në rrugën “Petro Cani” në kryeqytet.

Lidhur me arsyen e vizitës në Shqipëri, ai tha se kishte ardhur për të kaluar disa ditë pushime dhe lidhur me të dyshuarit e tjerë si të përfshirë në krim, deklaroi se njeh vetëm njërin prej tyre.

Aurel Hoxhallari është personi i shpallur në kërkim, i cili dyshohet si personi që ka organizuar atentatin, duke paguar 25 mijë euro Efthymiou Efthymious për të kryer krimin.

41-vjeçari dyshohet se e ka pritur Kasmin poshtë shtëpisë së tij ku dhe e ka ekzekutuar, për tu larguar më tej me motor.

Por ai rezulton se ka hyrë në mënyrë klandestine në vendin tonë, di duket për të mos lënë gjurmë, pasi nuk figuron i regjistruar në asnjë pikë kufitare.

Ai rezulton të ketë hyrë në Shqipëri, prej afro dy muajsh dhe gjatë kësaj kohe ka qëndruar në një banesë me qera në zonën e Unazës së Re.

Sakaq banesa e Hoxhallarit, e cila shërbente si bazë e grupit të strukturuar kriminal, ndodhet në kodrat e Mëzesit në periferi dhe është e “blinduar” me kamera sigurie.

Po ashtu përreth banesës ndodhen edhe tunele, ku mendohet se fshiheshin armët e sekuestruara.

Rolet e grupit

Gjatë këtij operacioni të zhvilluar mbrëmjen e së enjtes u arrestuan në flagrancë Elton Halipaj, 36 vjeç, lindur në Skrapar e banues në Tiranë; Efthymiou Efthymious, 41 vjeç, lindur e banues Arta, Greqi; Malvin Dinellari, 30 vjeç, lindur në Korçë e banues në Tiranë dhe Elton Hoxhallari, 36 vjeç, lindur e banues në Tiranë. Gjithashtu u shpall në kërkim (Altin) Aurel Hoxhallari, 41 vjeç, lindur e banues Tiranë.

I shpalluri në kërkim (Altin) Aurel Hoxhallari, dyshohet si organizatori i këtij grupi të strukturuar kriminal.

Elton Halipaj akuzohet se ka siguruar mjetet e nevojshme për kryerjen e krimit.

Shtetasi grek Efthymiou Efthymious, dyshohet në rolin e ekzekutorit të Kasmit si vrasës me pagesë, ndërsa rezulton se ka qenë pjesë e forcave speciale të policisë greke nga viti 1992 deri në 2012, kur dhe u përjashtua si i përfshirë në trafik droge.

Në momentin e arrestimit, atij iu gjetën me vete një sasi e konsiderueshme eurosh dhe parash shqiptare, që dyshohet se i ka përfituar si shpërblim për vrasjen.

Sakaq Malvin Dinellari ka siguruar mjetet dhe përgatitur infrastrukturën për realizimin e vrasjes.

Ndërsa Elton Hoxhallari dyshohet si bashkëpunëtor në sigurimin e mjeteve dhe përgatitjen e infrastrukturës për realizimin e vrasjes.

Gjatë këtij operacioni janë ushtruar kontrolle në disa banesa të autorëve të dyshuar si dhe në një vilë të ndodhur në periferi të Tiranës, në pronësi të organizatorit të këtij grupi, e cila shërbente si bazë e grupit.

Si rezultat i kontrolleve të kryera në këtë vilë është gjetur një arsenal armësh, municionesh, eksplozivësh, raketa hedhës, armë të preçizionit të lartë, minë me telekomandë, dylbi, radio ndërlidhje si ato të policisë, të cilat funksiononin në grup, maska, veshje kamoflazhi, etj.

Gjatë operacionit është sekuestruar në cilësinë e provës materiale automjeti, i cili dyshohet se është përdorur në kryerjen e vrasjes.

Në cilësinë e provës materiale janë sekuestruar 2 pistoleta, njëra prej tyre e dyshuar si arma e krimit; 4 armë automatikë; dy snajperë; katër pushkë automatike; një armë antitank me dy predha; një bombë me telekomandim në distancë; një sasi e konsiderueshme lënde eksplozive C4 dhe tritol; 4 radio marrëse; një dron; 110 kg kanabis dhe dy maska. /a.y/noa.al

Organizoi vrasjen e Kasmit, kush është kreu i grupit, i dyshuar dhe për atentatin ndaj mikut të Shullazit

Dëshmia e ish-policit grek për vrasjen e Kasmit: Jam i shokuar nga arrestimi

Shuma që mori ish-agjenti special i policisë greke për “kokën” e Devi Kasmit

Shtëpia me tunele e kamera sigurie, pamje nga baza e grupit kriminal që vrau Devi Kasmin

I gjatë, me mjekër dhe plot muskuj, del fotoja e ekzekutorit grek të Devi Kasmit

Kush e organizoi vrasjen e Kasmit, dy vite më parë porositi atentatin e shokut të Shullazit

Vrasësi grek me pagesë ekzekutoi Kasmin, dalin pamjet e operacionit për kapjen e grupit

Kasmi u ekzekutua nga vrasës me pagesë, kush është organizatori dhe “këmbëza”. Roli i grekut