Një tjetër emër i njohur për drejtësinë shqiptare dhe greke, 38-vjeçari Nardi Idrizi, alias Fatbardh Idrizi, është dënuar nga Gjykata e Athinës me 32 vite burg, pas një sulmi të armatosur në dhjetor 2023 ku plagosi rëndë tre të rinj nga Kreta.

Ngjarja ndodhi në zonën e Gazit në Athinë, dhe burimet konfirmojnë se sulmi ishte pasojë e një keqkuptimi banal, që përfundoi në një përleshje me armë zjarri.

Plagosje me qëllim vrasjeje për një debat në rrugë

Në dhjetor 2023, tre të rinj nga Kreta, dy vëllezër dhe shoku i tyre, kishin ardhur për pak orë në Athinë për të festuar festën e beqarisë. Teksa po ecnin në rrugë, ata u përfshinë në një debat verbal me pasagjerët e një makine tip fouristradë.

Mjeti ndaloi pak metra më poshtë dhe nga ai zbritën dy persona. Pas një përleshjeje të shkurtër fizike, Nardi Idrizi hapi zjarr me armë ndaj të rinjve, duke synuar në kokë dhe duke qëlluar edhe pas shpine. Mrekullisht, viktimat i mbijetuan atentatit.

Gjyqi – Dënim i rëndë për sulmin, por pa prani të viktimave

Gjykata e shpalli fajtor Idrizin për plagosje me dashje, përdorim armësh dhe mbajtje të paligjshme të tyre, duke caktuar një dënim total prej 32 vitesh burg, nga të cilat ai duhet të vuajë 20 vite realisht. Edhe pse tre viktimat kishin përfituar dëmshpërblim financiar, dy prej tyre munguan në gjykatë për arsye shëndetësore, duke ia lënë vendimin drejtësisë.

Profili i errët i Nardi Idrizit – Një histori kriminale në dy shtete

Nardi Idrizi, lindur në Durrës dhe banues në Vlorë, ka një të kaluar të ngarkuar me precedentë penalë në Shqipëri. Në vitin 2013, ai u dënua me 13 vite e 4 muaj burg nga Gjykata e Apelit për Krime të Rënda, për një sërë veprash:

Tentativë për vrasje ndaj dy efektivëve të policisë në Vlorë (2012)

Vjedhje me armë në kazino, karburante dhe banka

Mbajtje pa leje e armëve luftarake

Pas një grabitjeje në Vlorë në gusht 2012, ai hapi zjarr ndaj policëve Isuf Lamaj dhe Besnik Brahimaj. Ai rezulton i arrestuar atë vit dhe më pas përfitoi ulje të paligjshme dënimi në burgun e Fierit në vitin 2020, në një rast që u hetua nga prokuroria si pjesë e një skeme abuzive të uljeve të dënimit.

Në prill 2024, Idrizi u shpall sërish në kërkim në Greqi si pjesë e një grupi të trafikut të sendeve të vjedhura. Po ashtu, vëllai i tij Joni Idrizi, i arrestuar në shkurt 2024 në Greqi, është një tjetër person me precedentë për grabitura të armatosura, i dënuar edhe në Shqipëri.

Identitet i ndërruar dhe lidhje me krimin e organizuar

Nardi ka përdorur edhe emrin Fatbardh Idrizi, ndërsa vëllai i tij i vrarë, Leonard Idrizi, ishte pjesë e bandës famëkeqe të “Coles” në Vlorë. Më pas, Nardi mori emrin e vëllait të ndjerë për të humbur gjurmët.

***

Dënimi me 32 vite për Idrizin është një prej vendimeve më të ashpra të dhëna për një shtetas shqiptar në Greqi për ngjarje të fundit. Rasti i tij tregon një rrjet të gjatë veprimtarie kriminale, që përfshin dy shtete, identitete të shumëfishta dhe përfshirje në vepra me armë zjarri, grabitje dhe vrasje të mbetura në tentativë. /noa.al